🔰حيت الشرح ديال المصطلحات الدينية، تيكون معقد شي مراات بزااف و معمق، غاادي نشوفو داباا أهم مصطلحات دينية فالفقه لي مشروحة ببسااطة

🔵أولا، نعرفوا بالأحكام الخمسة

الأحكام الخمسة هي طريقة باش نفصلوا و نتعمقوا أكثر فمسألة الحلال و الحراام، هي تقسيم الحلال و الحرام ل 5 ديال الدرجات

هاد الأحكام الخمسة هوما : الواجب، المستحب، المباح، المكروه، الحرام

الواجب: هو شي حااجة لي مفروضة عليك ديرها، و يلا درتيها عندك حسنة، و يلا مادرتيهااش عندك سيئة. بحال الصيام مثلا. يلا كانت لحااجة وااجبة، رااه بالسيف علييك.

🙏 عوتاني هاد الواجب راه فيه أنواع: كاين واجب عين، و واجب كفاية.

1⃣ واجب عين هو شي حاجة لي كل إنسان مسؤول عليها و تيخصوا يديرها، مثلا بحال الصيام. كل واحد تيصوم لراسو، كل شاة تتعلق من كراعها.

2⃣ واجب كفاية: هو شي حاجة لي مفروضة على المسلمين كامليين، و لكن يلا شي وااحد دارهاا، راه صاافي تيعوض و تينوب على لوخرين. مثلا، الٱذان رااه واجب و فرض كفاية. علاش ؟ حيت كافي أنه يكون شخص واحد ولا 2 يقوموا بهاد المهمة، ماشي كلشي غاادي ينوض يودن، ولا نديرو نوبة كل نهار يأذن شي واحد، ولا كل صلاة شي واحد يأدن.

المستحب: هو شي حااجة لي من فوق الشبعة. هي مزياانة يلا درتيهاا و عندك فيها الأجر، و لكن على عكس الواجب، يلا مادرتيهاش هانياا، ماغااديش تعاقب. بحال صيام يوم الإثنين و الخميس، صيام الأيام البيض، صيام عرفات و عاشوراء، صلاة النوافل و غيرها. هاادو درتيهوم + نقطة/ حسنة. مادرتيهومش، ماعندك لا زائد ولاناقص. و تيتسمى المستحب حتى: المندوب، السنة، مسنون، نفل.

المباح: هو شي حاجة لي ماكاينش شي أمر باش ديرها ولا نهي باش تجاوزها. شي حاجة لي حلال علييك. بحال تناول الطعام والشراب ،  ولبيع وشراء ، والسفر للسياحة وطلب الرزق ، والرفث إلى الزوجات في رمضان ليلاً . و تيتسمى حتى الجائز  أو الحلال.

المكروه: المكروه هو شي حااجة لي من الأحسن تبعد علييها، و ماديرهااش، ويلا مادرتيهاش عندك الأجر. و لكن واخاا يلا وقع و طحتي فيها ماعلييك والو. المكروه هو شي حاجة لي حسن ليك بعد منها و خرج من باب واسع. أمثلة عليه هو اتباع النساء للجنائز، صلاة النافلة بعد العصر و الأكل و التعامل باليد ليسرية. عتابروه ضد المستحب

المحرم: هذا ضد الواجب. يعني هذا شي حاجة لي ماخاصكش ديرها، و يلا درتيها تتعاقب، و يلا مادرتيهااش عندك الأجر. أمثلة عليه هو: الزنا، و الربا، و شرب الخمر، و عقوق الوالدين. و تيتسمى حتى المحظور ولا الممنوع.

🔴مصادر الشريعة الأربع: هادوا هو منين تنجيبوا الأحكام ديال لحاجة واش حلال ولا حرام و غاادي نلوح بوسط عليهوم بوحدهوم مرة جاية.

⚪️حتى القبول الصراحة عندو شرطين: 1⃣أول شرط لقبول الأعمال هو الإخلاص، يعني تكون درتي واحد لحاجة لله تعالى ماشي بااش تباان قدام الناس. 2⃣ الشرط الثاني هو العمل يكون مطابق للشرع، يعني شي حاجة لي وصا بيها النبي و ديرها كيما قال، مااشي دير شي بدعة ولا تخربيقة بحال تمشي تزور شي ضريح و تقول راه درتها لوجه الله و دابا يقبلها الله 🐸

صوو، هاادي مصطلحات أساسية و بسيطة في الفقه. يلا عقلتي عليها و فهمتيها أتعاونك تفهم الفتاوى لي تلقى فغوغل.

ايخصك غي دير سؤال لي عندك و كاين مواقع بحال ( Islamweb, Islamonline, Islamqa, موقع إبن باز ) و غيرهاا و اتلقى لجواب ديالك