عاام جديد دخل ( ان شاء الله يكون عام خير على الجميع ) و النااس تيبدااو يديرو أهداف و يتاخدوا قرارات للعام الجديد   و هااد القضية

 مزيانة و خاايبة فنفس الوقت

ااه مزيانة لوااحد يطمح للأحسن و يكون عندو أهداف مااشي غي عايش و لكن،وااش ضروري تسااين حتى لراس العاام بااش تتاخد قرار أنك اتبدل شي حااجة فحيااتك ؟ يلا عرفتي بلي رااه فيك واحد ديفوا لي خااصك تصلحوا، اتبقا تسااين شهر ولا شهرااين ولا كتر حتى يجي رااس العاام عااد تقول مع رااسك انديرو ؟  

من الأحسن أن الإنسان يعيش بواحد العقلية ديال كل نهار هو بداية جديدة و كل نهار يمكن ليك تخدم على راسك و طورها، ماحدك تتفيق فالصباح و تتنفس و تتفكر إلا و راه بإمكانك تدير أهداف جديدة لدااك نهاار و تحدى و تطور رااسك 

يعني لوااحد ماخاصوش ينسااق مع فكرة أني ندير أهداف جديدة لراس العام، ثقافة جات من الغرب و مزياانة و لكن مااشي أحسن نموذج للعيش

و لكن مهم، بالنسبة للناس لي غادي يديرو أهدااف جديدة و يبغيو يحققوها، شنو الحل ليهوم باش دوك الأهداف ماتبقاش حبر على ورق  ؟ شنو الحل بااش دوك الأهداف و دوك الأفكار ديال نبدل حياتي لي تتجيك بالليل، مايتنسااوش فالصباح ؟ شنو الحل بااش أخيرا تبدل حيااتك و تعيش الحياة لي نتا باغيها و تتخايلها ؟ 

اوكي، كااين بزااف ديال لحواايج لي ادير و اول حااجة هي

1⃣ تكتب دوك الأهدااف فدفتر ولا ورقة مهم بستيلو ماديرهومش فطيليفون دياالك ولا فبيسي!

علااش ؟ مهم كااين دراسات تتبت بلي فاش تتكتب حااجة بيديك فورقة تتزيد إحتمالية أنك تحققها + ماتتنساهومش دغياا

من ضمن الدراسات هي وحدة دارت فجامعة هارڤرد فعام 1979، سولو الطلبة لي تخرجوا داك العام واش عندكوم أهداف للمستقبل. 3% كان عندهوم أهداف واضحة، و مكتوبة، 13% كان عندهوم أهداف واضحة و لكن ماشي مكتوبة. و 84% ماكانش عندهوم أهداف فخطرة. دازت 10 دسنوات و لقاو بأن 13% لي كان عندهوم أهداف فدماغهوم تيدخلوا ضوبل ديال لفلوس ديال 84% لي ماكان عندهوم لا هدف لا تاوزة، و عوتااني دوك 3% لي كان عندهوم أهداف و مكتوبة كانوا تيدخلوا 10 ديال لمراات فلوس كتر من گااع دوك 97%! 

يعني لي عندوا شي دفتر يجبدوا و يبداا يكتب 🐸

و عوتااني سبب بسيط هو يلا كتبتي الأهداف ديالك فطيلي فل memo مثلا، رااك غاادي دخل تشوفهوم و شوييا و غاادي طلق كونيكسيون و دخل لفايس ولا واتسااب و داك لموتيڤاسيون و الجهد ديال الخدمة لي كاان بحاال يلا عمرو ماكاان 

2⃣ الحااجة الثاانية، هي الطريقة بااش تكتب دوك الأهداف، 

خااصك تكتبهوم بطريقة وااضحة و بالحرف، يعني يلا شي حد قرا الأهداف ديالك نتا غاادي يعرفك شنو بااغي دير بالضبط و فوقاش بغيتي توصل ليهوم. 

يعني ماتقولش هاد العاام بغيت يوليو عندي فلوس كتر، حيت رااه يلا عطيتك درهم صاافي ولااو عندك لفلوس كتر 

ولا بااغي نبدل صحتي ؟ بااغي تبدل صحتك تولي مرييض مثلا ولا شنو ؟ 

و ايييه غاادي تقول بلي رااه بااين شنو بااغي، رااني عاارف رااسي و كداا و لكن فااش تتخلي دوك الأهداف غاامضة ماتيكونش عندك وااحد الداافع بااش تمشي ديرهوم، ماتتكونش اصلا عاارف شنو اديير، و  كنتيجة ماغااديش تعرف راسك واش وصلتي ليهوم ولا لا، حيت داكشي عندك مجرد، غي هضرة فالهواء و صاافي 

3⃣ لحااجة ثاالتة،  كتب  علايااش بغيتي توصل لداكشي، شنو الهدف دياالك شنو هو لموتيڤاسيون ديالك، شنو هي القصة ديالك، شنو هو الداافع دياالك لي ايخلييك تسهر الليل و تخدم بالنهاار بااش توصل لداكشي لي بغيتي، شنو هي لحااجة لي اتخلييك تعرف بأن هاادشي كاامل لي تاديير نتاا و هاد تماارة كااملة لي تتضرب رااه عاادية و تستااهل حيت فاللخر، فنهاية النفق كااين وااحد الضوء لي غاادي يخلييك تبكي بالفرحة 😌 

4⃣ سبب اخور لااش نااس ماتيصولوش للهدف ديالهوم هو تيباان ليهوم الهدف كبيييير بزاااف، مثلا شي حد ايقولييك انا بغييت نتعلم لونغلي، غاادي يشعل تلفازة غاادي يدير فيلم، ايلقاهوم تيهضروا بالزربة، ايطفي التلفاازة، و غاادي يخرج للزنقة، و غاادي ينسى شنو هي لونغلي گااع و غاادي يحيد ديك الفكرة من رااسو حيت تتباان ليه ديك لونغلي ( اولا داك الهدف ديالو ) بحاال شي جبل ولا عماارة كبييييرة و هو بااقي غي لتحت 

يعني خااصك تقسم الهدف ديااالك لخطواات 

بغيتي دير واحد لحاجة فهاد العام الجديد، قسمها و كتب شنو داكشي لي خااصك دير ف مدة 3 أشهر، و شنو لي خااصك دير فمدة شهر، و شنو لي خااصك دير ففترة سيمانة، و شنو المهام اليومية لي اتقوم بيها باش تعرف رااسك غاادي فطريق تحقيق الحلم دياالك، و فاش اتقوم بدوك الحاجات الصغيرة ايبدا يباان ليك الفرق مع المدة و هكا اتفتااخر برااسك و اتزييد تعطي كتر 

5⃣ هااد الأهداف ديالك ديرهوم فشي بلااصة لي تبقى تشوفها يوميا، داكشي لي كتبتي علقوا فبيتك، فشي مرااية، حدااك فين تتنعس، فوق لبيسي، مهم هو خااصك تشوفو يوميا و تحفز باش توصل ليه، يمكن ليك حتى تااخد تصااور من مجلات ولا من غوغل ديال دوك الأشياء لي باغي توصل ليها، مثلا بغيتي تساافر تمشي للصين ولا ميريكاان،  بغيتي تقراا براا، تخدم هنايا فالمغرب، تدير مشروع ديالك رااسك، شوف تصااور ديال داكشي و خلييه فشي بلااصة لي اتشوفها دييما و غاادي يتحققوا أحلام دياالك ( مااشي بطريقة سحرية - و لكن حيت تتفكرهوم كل نهاار و تتخدم عليهوم) 

6⃣ داكشي لي بااغي توصل لييه، خااصك تكون مٱمن  برااسك 100% بلي تقدر توصل لييه، حيت يلا شكيتي فراسك ماغااديش تعطي واحد الجهد، اتعطي جهد قلييل و النتيجة تا هي اتكون أقل من داكشي لي بغيتي

علييها تيق فرااسك و بداا تصرف بحال يلا وصلتي لداكشي اصلا✌️ بهاد الطريقة اتبدل عقليتك بزااف و ايجيك داك الحلم سااهل توصل ليه و الطريقة  اتجي تا لعندك 

7⃣ شوف شي حد لي ديجا وصل لداكشي و تعلم منو، هكا اتقدر تختاازل التجاارب ديال سنين فأيام و ربما ساعات 

8⃣ كنصيحة، ماتخليش الأهداف ديالك محصورة فواحد المجال فقط ديال لفلوس ولا الخدمة، دير أهداف أنك غاادي تهلا فصحتك، تحسن علاقتك مع النااس ( واليديك، خوتك، و صحابك )، دير هدف أنك تقراا و تعمر راسك، هدف أنك تزيد فقرايتك، هدف أنك تعييش حيااتك و تدوز عام زوين، و دير بالطبع  أهدااف أنك تجمع لفلوس و تخدم و لكن مااتحصرش رااسك غي فشي حااجة وحدة، لحيااة فييها بزاااف 

9⃣ فاش يتسالا العام، رااجع الأهداف لي درتي و شوف شحال لي نجح بنسبة 100% و شحال لي نجح بنسبة 50%، و شوف واش مزاال عندك نفس التفكير بخصوص الأهداف و حياتك، مهم هو ترااجع نفس فاللخر. 

🔟 فااش ادير هادشي اتقدر تحقق حتى داكشي لي تتفكر فيه بالليل، لي تيبان ليك صعيب و غالبا تتنسااه فاش تتفيق 🐸 

بس: دخل لهناا باش تطيليشاارجي Pdf لي غادي يعاونك تراجع العاام الفايت و توجد لهاد العاام الجديد 👇🏻👇🏻👇🏻

و عسى أن تتحقق أحلامكم فالقريب 💓

بييييس ✌️