شنو تدير من مور لبااك؟ 

كل واحد و الأهداف ديالو و الطموحات ديالو، و الله يسر لكل واحد فأنه يوصل لداكشي لي بااغي.

هاادشي لي غاادي نذكر هناياا هوما أمور لي بالتجربة ديالي و بالتجربة ديال بزااف ديال النااس تيسااعدوا على أنك تحقق داكشي لي بغيتي بسرعة.

1⃣اول حااجة لي هي بديهية و خااصك تكون عارفها هي الطموح ديالك نتاا. شنو هي المهنة ولا المشروع لي بااغي نتاا تحقق فحياتك. هاد السااعة أنفترض بلي كلشي ديجاا قرر و عرف شنو المهنة و التخصص لي باغي يمشي فيه من مور لباك، و ندوزوا للحاجة الثانية لي خاصك.

2⃣لحااجة ثانية لي خاصك هوما Hard skills أي المهارات الحيوية ولا الجوهرية. هاادو بإختصاار تيعنيو شنو هوما لمعارف، لقرااية، ديبلوم لي خااصك باش تخدم فواحد المهنة معينة.

بغيتي تكون طبيب، مهندس، محامي، أستاذ، بوليسي، دير مشروع ديالك، تيخصك مجموعة ديال لمعاارف باش تخدم فهاد المهنة. تيخصك تقراا عليها و هاادشي بطبيعة الحاال أتديروه فالجامعات ولا المدارس فين اتقراو مور البااك.

و لكن الجاامعة و المدارس لقرااية ديالهوم محدودة. ماغااديش يعطيوك كلشي و راكوم عارفين هاد لقضية. و تنظن بلي راكوم عارفين حتى بلي كااين يوتيوب فين تقدروا تقرااو كتر. و لي بغيت نهضر عليه داباا هو واحد المصدر لي رااه من أحسن المصاادر ديال التعلم. هاد السيت هو Coursera.org 

هاد الموقع هو منصة لي أحسن الجامعات فالعالم تتحط فيه دورات تكوينية فجميع التخصصات. و الدورات التكوينية ديالهوم طوب لا من نااحية داكشي لي تيقريوك، الشرح ديالهوم، و عاد تتقراا فالوقت لي نتاا ولا نتي منااسبك من الدار. و فااش تتساالي من ديك الدورة التكوينية تتااخد شهادة فاللخر لي تقدر تدير ف CV ديالك.

و هاادي حااجة لي اتخليك متميز فسوق الشغل من بعد. يلا كنتي نتا و شي حد اخور دافعين لنفس الخدمة، و عندكم نفس الدبلوم، المشغل غاادي يختاارك يلا لقا بلي دوزتي وقتك فلقرااية و كنتي تاطور رااسك بنفسك. و كااين حااجة أخرى مهمة لي شويا و نهضر عليها. 

وااش لقرااية فهاد السيت فابور؟

الجوااب هو ٱاه، و لا فنفس الوقت. لقرااية بلفلوس، و لكن يمكن ليك تدفع ل Financial aid لي هي مسااعدة مالية، بحال المنحة و تتقرا ديك لفورماسيون و تتشد الشهادة فاللخر فاابور.

كيفااش تادفع؟ 

سااهلة، فااش غادي تدخل لفورماسيون ايباالك منين ادفع. تيطلبوا ليك معلومات بساطين بحال: واش خداام، ولا تتقرا، ولا والو. شحاال لي تقدر تخلص على هاد الشهادة. و تيقولك كتب 2 ديال الفقرات. لولة فيها: علااش تتدفع لمساعدة المالية: تتقولهوم حيت ماعندي تا رياال باش نخلص. و الفقرة ثانية: تيسولوك كيفااش الحصول على هاد الشهادة غاادي يقربك من تحقيق أهداافك المهنية.

🔵 للإشاارة ماتيقولك عطي لا شهادة مدرسية لا حتى شي وثيقة. أناا لداباا تندفع تنقوليهوم رااه مزاال تنقراا ولا ماخداامش ولا شي حااجة بااش نقراا فابور.  🤣🤣🤣🤣 و فاش تادفع ليهوم، تيجاوبوك من بعد 15 يوم. و ديما تيقبلو. و يمكن ليك تدفع ل كتر من 20 فورماسيون فدقة وحدة. و فاش تادوز يمكن سيمانة، يمكن ليك تعاود تدفع مرة أخرى ل 20 فورماسيون. مهم تقراا حتى تعيا. 

🔵للإشارة عوتااني، أغلب لي فورماسيون لي كاينين تماا راهوم  بالإنجليزية. هاادشي علااش فاش تدخلوا للسيت، بدااو بدورات تكوينية ديال الإنجليزية بااش من بعد يمكن ليكوم تقرااو على مجالات أخرى بسهولة.

3⃣لحااجة ثاالتة لي محتاجين هي Soft Skills و تتعني مهارات موازية أو مهارات شخصية. هاادو هوما دوك روح الفريق، مهارات التواصل، تسيير الوقت، حل المشكلات.

هادوا مااشي هوما المهارات الأساسية لي غاادي تحتااج فالخدمة بطريقة مباشرة. و لكن هوما حواايج لي غاادي يسااعدوك تكون متميز و غاادي يعاونوك تحسن الأداء ديالك فالعمل ديالك بغض النظر غلى الوظيفة ديالك. و ايسااعدوك حتى فحياتك بصفة عامة. 

🔵هاادو مهاراات لي يمكن ليك تطور و تعلم من خلال الدورات التكوينية لي كاينين ف Coursera و حتى فحياتك الواقعية. حيت مايمكنش تقراا على كيفااش تحل النزاع ولا كيفااش تسير وقتك ولا كيفااش تخدم مع الناس فقط. تيخصك تقراا هادشي و تقلب على فرص فين يمكن ليك تخدم دااكشي لي قريتي و يولي جزء منك. 

🔵المهارات لي مهمة بالنسبة لييا أناا ولي مطلوبة فسوق الشغل بزااف هي: القيادة، الإنتاجية، التفاوض، الإقناع، الذكاء العاطفي، طرق التعلم الفعال، فن الخطابة، التعامل مع ستريس، إجتياز المقابلات الوظيفية، التواصل الفعال، إتخاذ القرارات، و  الإبداع. 

كااينين مواقع خرين من غير Coursera.org و لكن هذا هو المفضل عندي. صوو، دخلوا ليه، شوفوا الأمور لي باغيين تعلموا و قرااوها، طوروا راسكوم، و كونوا متميزين فالحياة و فسوق الشغل.

🔴للإشارة هاادشي مااشي غي لصحااب لبااك، حتى للنااس ديال سيزيام  و أي وااحد تيحتااج أنه يقراا  و يطور رااسو.

⚪️عاارف لعاام كاامل و نتوما تتقرااو، عليها ماتنوقع تا شي وااحد أنه يدير هادشي داباا، و لكن هاادي حااجة لي تخلييو فرااسكوم. ويلا شي حد قرر أنه يبداا داباا و يطور رااسو فهاد الصيف، هذاا غاادي يكون أحسن إستثمار داار فحيااتو. 

بس: هاادشي لي كتبت هو شي حااجة لي من قلبي تنتمنى كون شي حد قالها لييا فاش كنت تنقرا فلافاك و فااش شديت الإجازة، علييها اهتمواا بزااف بهااد لهضرة. اتنقص عليكوم تماارة.

💓و فالأخير مبروك للنااس لي نجحوا فالبااك هاد لعاام، حظ موفق للناس لي غاادي يدوزوا الإستدراكية، و الله يسمع خباا الخير لأي وااحد تيسااين نتاائج الإمتحاان الجهوي. 🙏 

بييييس ✌️