علاش الصحة النفسية؟

قررت أني نبدا مجموعة ديال البوسطات حول مواضيع الصحة النفسية، و هاد المواضيع غاادي تكون مختلفة و تتشمل: التعامل مع التفكير السلبي، الإكتئاب، القلق، الوسواس القهري، التعامل مع المشاعر السلبية بحال الخوف و الغضب، تجاوز صدمات الطفولة، ستريس، و غيرها. 

أي حااجة لي عانيتي منها فالصغر، تتعاني منها داباا، ولا تقدر تعاني منها مستقبلا غاادي تلقى الحل ديالها هناا. 

السؤال لي بديت بيه لبوسط هو علاش الصحة النفسية؟ علاش خاصنا نهتموا بيها؟ و علااش أنا غاادي نعطيها وقت كتر بااش نهضر عليها؟

أول و أهم سبب عندي هو أن هاد المشااكل هي شي حاجة لي عانيت منهاا تا أنا فحياتي، فالطفولة و فالماضي ديالي بصفة عاامة.  و كنت عانيت نتائج سلبية كتر خلال فترة كورونا.  

و لكن حمد لله قديت أني نتجاوز جميع دوك المشاكل و نحسن صحتي النفسية بشكل كبير. و لكن واخا أناا تجاوزت هادشي، مانسيتش الشعور ديالي فديك لوقيتة. مانسيتش گااع دوك المشااعر السلبية و الأمور لي عانيت. و مزاال عااقل على حااجة أخرى. 

فوسط دوك الأيام السوداوية لي دزت منها كنت واحد النهار عطيت لراسي واحد لكلمة، و نذرت لله أنه يلا الله عاوني نتجاوز گااع دوك المشاكل غاادي ناخد بيد أي وااحد لي تيعاني و نخرجوا من أي أزمة و ورطة. 

و هاادشي لي غادي ندير داباا. غاادي نوفي بداك الوعد و النذر لي قمت بيه فديك الفترة. 

🔵 سبب اخوور لااش قررت أني نكتب على هاد الموضوع هو فهاد الفترة لي بديت تنقري فيها مع الدولة لااحظت بلي بزااف ديال التلامذ عندي عندهوم مشااكل نفسية و تالفين، ماعارفينش كيفااش يتجاوزوها. 

صوو، هاادي محاولة بااش أني نخليهوم يحسوا بلي راه مااشي بوحدهوم و كااين نااس ( من ضمنهم أناا ) لي عارف بااش تيحسوا و قادر أنه يعاونهوم. 

🔵 ٱخر سبب ( لي قادر نفكر فيه داباا ) هو أن بزااف ديال النااس تيعانيو فصمت من الإكتئاب و مختلف الأمراض النفسية و ماتيلقاوش حل ليها. 

كااين لي تيساالي حيااتو فاللخر بالإنتحاار حيت ماتيلقااش مسااعدة، حيت غالباا ماتيطلبهااش ولا يفكر أنها موجودة أصلاا. 

و هاد النااس هادوا يقدروا يكونوا دايرين بيكوم. ماتتبانش عليهوم واش تيعانيو من الإكتئاب ولا لا، ولا وااش تيفكروا فالإنتحاار. 

تيفكروا و تيخلييو دااكشي فلدااخل ديالهوم، و تيااكل داك الألم منهوم شوييا بشوييا. 

شي مراات تتلقى هاد الناس كوميديين، مشهورين، أغنيااء، سياسيين و نااس لي نتاا أتوقع منهوم أيكونوا سعدااء و عندهوم حياة مثالية. 

و لكن الواقع تيكون مختلف بزااف. 

قبل مانسالي هاد لبوسط خااصني نذكر واحد لحااجة: 

⚠️أنا مااشي طبيب نفسااني ولا معالج ولا حتى كوتش، و لكن أناا إنساان لي عانى من هادشي كاامل و قدر يتجاوزوا. 

كيفااش تجاوزتوا؟

قصة طويلة و لكن بإختصاار واحد النهاار ملييت من العدااب النفسي لي كاان فرااسي و قررت أنا نلقى حل لرااسي. و بحاال جميع النااس دخلت ليوتيوب تنقلب على شي حاجاات لي تعاوني، أمور لي نصحوني نااس نقلب فيها. 

لقيت ڤيديو عجبني تفرجت ليه و كان فيه 5 دقايق، موراها وليت تندير ڤيديو ديال نص سااعة، موراها ساعة، موراها تنقرا كتااب فشهر، شوييا كتاب فسيمانة، حتى وليت تنقرا كتااب و شي مراات 2 فالنهار. 

و من ديك لفترة ديال كورونا لدابا قريت كتر من 150 كتااب، و أغلبيتهم فمجال الصحة النفسية. 

و لي غاادي ندير من لقداام هو نجيب ليكوم أحسن الأفكار العملية بشكل سهل التتبع و التطبيق ديالوا باش تجاوزوا المشااكل النفسية لي عندكوم. 

كتر من 280 مليون شخص تيعاني من الإكتئاب فالعالم، كتر من 264 مليون شخص تيعانيو من القلق، و 800 ألف شخص تيرتكب الإنتحار كل عام. يعني تقريبا كل 40 ثانية شخص تينهي حياتو.

فهاد الوقت لي قريتو فيه هاد لبوسط راه مجموعة ديال النااس سالات حياتها بسبب الأمراض النفسية.

هاادشي علااش، جاا لوقت بااش مانسكتوش و نهضروا على هاد المسألة.

🔵شنو غاادي تستاافد يلا قريتي هادشي و تبعتي معاياا؟

أتستاافد من مجموعة ديال الحلول لي ايعاونك تجاوز أي مشكل نفسي عندك و غاادي تولي عندك واحد المناعة و صلابة نفسية.

اتخلص من مشااكل المااضي، و غاادي تولي قاادر تعاامل مع أي مشكل جاا فطريقك، و غاادي توصل لمستوى ٱخر ديال السعاادة. 

أتعلم كيفااش عقلك تيخدم و كيفااش تيأثر على حيااتك و غاادي تعرف كيفااش تخدم هاد المعرفة باش تعيش حياة أسعد. 

بطبيعة الحاال غاادي يكون عندك مشااكل مستقبلا فحيااتك، و لكن غاادي تعرف تعامل معاهوم و ماغاديش يكونوا بنفس الحدة. اي مشكل ايجي غاادي يلقااك واجد و اتقدر تخلص منو بسهولة. و اتعرف معنى الرااحة النفسية. 

تنقول هادشي و مأكد منو حيت ديجاا حققتوا أناا. و داباا جاات نوبتكوم نتوما.  💪

الصحة النفسية مهمة بحاال الصحة الجسدية ديالنا، و من دابا لفوق غاادي تعرفوا كيفااش تحاافظوا عليهاا، و ترجعوا الإبتسامة يلا كنتوا فقدتوها. 😁

واجديين؟ 🐸