تبغي تحس بالسعادة كل نهاار فحيااتك؟ 

كلشي يبغي، و يمكن ليك. 

يمكن مااشي كل نهاار، و لكن فأغلب الأوقات، يلا عرفتي كيفااش تصاايب واحد الشروط ديال السعادة لي اينفعوك و لي مافيهومش دوك العيوب لي هضرنا عليهوم من قبل. 

العيوب كانوا هوما أن الشرط ديالك مستحيل تحققوا، خارج على السيطرة ديالك، و محدود بزااف. 

داباا غادي يخصناا نعكسوا هاد العيوب باش نتحكموا حنا فالسعادة ديالنا و مانخليوهاش فيدين الٱخرين. 

يلا عاقلين من قبل هضرت على شروط السعادة ديالي، و لي كانوا أنني خاصني نكون إنسان مثالي، مافيه عيوب، حياتي تكون مثالية، و مانديرش الأخطاء، و النااس كاملة تبغيني. 

و لكن من بعد ماقريت على هاد الشروط، بدلت شنو خاص يوقع باش نكون سعيد. 

ولا بالنسبة لييا باش نكون سعيد، خاصني نفكر فلحوايج زوينة لي فحياتي، تكون صحتي مزياانة، نسااعد النااس لوخرين، نجلس غي فالدار مع العائلة، ولا فقط نكون عاايش فقط و هادشي كاافي باش نعتبر رااسي سعيد. حيت ماحدك عاايش، تقدر تدير أي حااجة. 

نهضروا علااش هاد الشروط حسن من لوخرين لي شفناا لمرة لفايتة. 

1️⃣تحت السيطرة

هاد لمرة أنا لي تنتحكم فالسعادة ديالي. حيت أنا لي غادي نفكر فلحوايج زوينة لي وقعات فحياتي، نساعد النااس يلا بغيت، نجلس فالدار. 

هادشي كاامل أنا لي تنتحكم فيه و ماشي شي حد اخور. 

بالنسبة لصحتي، ماشي شي حاجة لي تنتحكم فيها بنسبة 100٪ و لكن عندي تأثير كبير عليهاا. أما ٱخر حااجة، هي أبسط وسيلة أنك تكون سعيد. فقط حمد لله على أنك عاايش؛ خلااص يلا متي، ديك السااعة ماغاديش تسوق للسعادة. 

2️⃣ساهليين باش يتحققوا

هاد الشروط الجداد ساهلين بزااف انهم يتحققوا. أي واحد يمكن ليه يفكر فداكشي لي زوين فحياتو ( أنا مثلا ) ؛ أي وااحد يقدر يسااعد النااس؛ أي وااحد يقدر يجلس فدارو و يرتااح. 

3️⃣شروط متنوعة. 

قبل كنت دااير لرااسي بزااف ديال القيود بااش نكون سعيد. 

أما داباا حااجة وحدة فهاادو تقدر تخليني سعيد. يعني عطيت لرااسي كتر من فرصة بااش أني نخلق السعادة لرااسي. 

فااش بدلت الشروط ديال السعادة ديالي، كنت كتبتهوم فورقة و خليتهاا حداياا فاللول بااش مانسااش و مانرجعش للأفكاار لقداام. 

و هادشي لي خاصكوم ديروا داباا. 

🔴أولا، رجعوا قرااو الشروط ديالكوم لقداام. ( لي جبدتوا فٱخر بوسط )

🔴ثانياا، بدلوهوم و خليو الشروط ديالكوم بسااط، تحت السيطرة ديالكوم، و غير محدودين. 

🔴كتبوهوم فشي ورقة و خليوها حداكوم بااش ماتنسااوهومش.  

و هكاا أتكونوا بديتو فأنكم تحكموا فالسعادة ديالكوم. 

أنشوفكوم الأربعاء الجااي فبوسط اخور على كيفااش تكون سعيد داباا و فأي وقت فحياتكوم. 

بييييييس 🐸✌️