1️⃣شنو تتعرفوا على صلاة التراويح؟

من ضمن العبادات لي تنقومو بيها فشهر رمضاان هي صلاة التراويح. و هي سنة مؤكدة: لسنة المؤكدة هي شي حااجة لي كاان النبي تيديرها تقريباا دييما و لكن مامفروضااش واخا هكااك. 

و تسماات بهاد السمية حيت الصحابة كانوا شحاال هادي تيرتااحوا فيها ما بين كل 4 ديال ركعات حيت كانوا تيطلوا فالصلاة. و بحال الصلوات الأخرى، يلا درتيها فالجامع حسن من أنك تصليها بوحدك فالدار. 

بالنسبة للركعات ديالها، ماكااينش شي حااجة محددة: يمكن تكون 20 ركعة، ولا 36، ولا 10 ولا 13. مكااينش شي حاجة لي صحيحة. المهم هو أن دااكشي لي تصلي ولا يصلي بيكوم الإمام يكون فيه الطمأنينة و يصليها بشوييا. 

2️⃣حكم صلاة الوتر!

صلاة الوتر -بحال صلاة التراويح- تتسمى صلاة التطوع ( يعني مامفروضااش). 

واخاا بديت بصلاة التراويح فلول، و لكن صلاة الوتر مؤكدة كتر منهاا. و بزااف ديال العلماء لي تيقولوا رااه وااجبة و مفروضة گااع، و لي ماصلااهش ماشي مناا. 

الوتر هو ركعة وحدة، و يمكن تصليها غا بوحدهاا، ركعة نيت، ولا تصلي قبل منهاا 2 ركعات و تختم بالوتر، ولا تصلي 4 أو 6 و يمكن توصلها حتى ل 3 ركعة، تقوم الليل و تختم بالوتر. و تتبداا لوقيتة ديالو من موراا لعشاا حتى لقبل لفجر. 

و يلا درتي 3 ديال الركعات كافية. تصلي 2 ركعات و تسلم. و من بعد تزيد ركعة ديال الوتر بوحدها تصليها. يلا درتي هاد القضية، يستحب ( يعني من الأفضل و لكن مااشي ضروري ) تصلي فالركعة الأولى بسورة الأعلى، الثانية بسورة الكافرون، و ثالتة بسورة الإخلاص. 

3️⃣السنن الراتبة!

من غير الوتر و التراويح، كااين واحد لحااجة تتسمى السنن الراتبة. و هاد السنن الراتبة هي 10 ديال ركعات، لي تتقسم على هاد الشكل:

2 ركعات قبل الظهر و 2 ركعات بعدو، 2 ركعات من بعد المغرب، و 2 ركعات قبل الفجر. 

بس: كااين شي علمااء تيقولك بلي خااص تكون 4 ديال الركعات من قبل الظهر، يعني فالمجموع اتكون 12 مااشي 10. 

و هاد الركعات من الأحسن لوااحد يديرهوم فدارو، مااشي فالمسجد. حيت عائشة رضي الله عنها روات على النبي بلي كاان تيصليهوم فالدار و عاد تيخرج يصلي بالنااس فالمسجد عادي. 

و الهدف هو أن لواحد يخلي هااد العبادة بينو و بين الله، بااش يتفادى الوقوع فالرياء، و يكون إخلاص العمل لله، زائد أن النبي قاال «اجعلوا من صلاتكم في بيوتكم، ولا تجعلوها مقابر». 

خلااصة:

الصلاة هي فريضة و ركن من أركان الإسلام. و كااين الصلوات الخمس المفروضة و كااين صلوات أخرى لي واخاا نقولوا مااشي مفروضة و لكن سنن مؤكدة و النبي كاان محاافظ عليها بزااف. و ذكرناا أمثلة عليها فهاد لبوسط: التراويح، الوتر، و السنن الرواتب. 

غداا إن شاء الله غاادي يكون ٱخر بوسط على الصلاة و غادي نهضروا على: سجود التلاوة، حضور النساء للمسجد، و صلاة الجمعة. 

نتشااوفواا غداا ان شاء الله. 💪

بيييييس ✌️🐸