ليوما دخلنا فالعشر الأيام الأخيرة من رمضان. و عارفين ديجا بلي فهاد العشر الأيام تتكون ليلة القدر. صوو نهضروا عليها بصفة عامة، معلومات خاطئة عليها، و شنو مزياان دير فهاد الليلة. 

مهم هي ليلة القدر ليلة وترية فرمضان ( ليلة، 21، 23، 25، 27، 29 ). ليوما نهار 20 فرمضان داز، يعني دخلنا فليلة 21، و نهار 22 فرمضان مع المغرب، اتكون بدات ليلة 23، و هي غادة.

ليلة القدر تتكون متغيرة ما بين رمضان و رمضان. تقدر رمضان لي فاتت تكون هي ليلة 21 و هاد رمضان 23 و رمضان الجااي 25 و هي غادة.

كاين تفاسير مختلفة لاش تسمات بهاد السمية. من ضمنهوم أنها هي ليلة ذات قدر كبيير و مكانة. عندها مكانة كبيرة حيت فيها نزل القرٱن و تتنزل الملائكة فيها. أو حيت فهاد الليلة تتقدر أرزاق الناس و و ٱجالهم. فيها يفرق كل أمر حكيم {الدخان:4} 

كاين علامات ديال ليلة القدر، كاين لي تتجي قبل من بدايتها زعما ها هي اتبداا وجدوا راسكوم، و كاين علامات لي تتجي موراها، تتبشر لي خدم فديك الليلة. العلامات ديالها هوما: فأثناء هاد الليلة تتكون السماء صافية مافيها لا برد ولا حر.  العلامة لي تتكون حتى تادوز ليلة القدر هي الشمس تتصبح داك النهار بيضاء و لا شعاع فيها. و بالنسبة للناس، تيحسوا بالراحة فيها و الطمأنينة. 

صو المهم من هادشي كامل هو شنو دير فيها. النبي كان تيجتهد فيها، و تيكثر من العبادات لي كان تيدير فالأيام العادية. 

1⃣ من أحسن الأدعية فهاد الليلة هو الدعاء لي وصى النبي عائشة به: ( اللهم إنك عفو تحب العفو فاعفوا عني )

و الدعاء إما لمسألة متعلقة بالدنيا أو بالٱخرة مزياان. 

و الدعاء عبادة كيما قال الرسول، و عليه الأجر. و مذكور هاد الأمر حتى فسورة غافر  {وَقَالَ رَبُّكُمُ ادْعُونِي أَسْتَجِبْ لَكُمْ ۚ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ (60)} 

السبب الثاني لاش الدعاء مزياان هو قول أحد الصالحين:

( ما أدَمت الدُّعاء في رَمضان على أمرٍ إلا وتَجلّى ظاهرًا في شوّال ) 

صوو دعيو مع راسكوم و مع الناس لي عزاز عليكوم حيت دعوة المسلم لأخيه المسلم بالغيب مقبولة + تيكون ملك تيقول على أي دعوة دعيتيها و لك بالمثل.   

2⃣ القيام. النبي قال :"من قام ليلة القدر إيمانا و إحتسابا غفر له ماتقدم من ذنبه". إيمانا أي مٱمن بداكشي لي وجد الله ديال الأجر و الثواب للناس لي تيتوفقوا فديك اللية، و إحتسابا أي طلبا للأجر.

و لكن واحد المسألة لي نعرفوها، هي المقصود فهاد الحديث هو أن الصغائر هي لي تتغفر، ماشي الكبائر. فأي حديث لي تلقاو فيه أن الذنوب لي سبقات تتغفر كاملة ( إماا الأحاديث على رمضان، ولا ليلة القدر، ولا الحج، ولا الصلوات الخمس، و لا صيام عاشوراء و عرفات ) هنا القصد هو صغائر الذنوب لي تتغفر أما الكبائر تيخصها توبة نصوحة خاصة بيها. 

و الصلاة هنا تتكون ركعتين فركعتين. كاين حديث تيقول فيه النبي:" صلاة الليل مثنى مثنى، فإذا خشي أحدكم الصبح صلى ركعة واحدة توتر له ما قد صلى" 

النبي كان تيصلي 11 ركعة. يلا بغيتو تانتوما تصليو 11 مزيانة، بغيتو تفوتوهاا، مزيانة، صليتو قل منهاا تا هي مزياانة 🐸 

3⃣ الإكثاار من تلاوة القرٱن و ذكر الله بصفة عامة تا هو من ضمن الطرق باش تقيم ليلة القدر. و قيام ليلة القدر داخل فيه گااع العبادات. 

4⃣⚠️ بالنسبة للحائض،  يمكن ليها تا هي تستغل ليلة القدر بجميع العبادات من غير الصلاة و الصيام بالطبع. يمكن ليها تستغفر الله، تدعي الله، تقرا القرٱن و الذكر. 

الحكمة من أن ليلة القدر مخفية هي باش لواحد يجتاهد فهاد الأيام العشر الأخيرة كاملة. و كيما تتعرفوا العبرة بالخواتم، لي مشاا عليه لول يقدر يعوض فاللخر.

دخلو لهنا باش تيليشارجيو 2 كتب قصر ديال الأدعية: 👇👇

https://drive.google.com/ad3iyat-laylat-l9adr

صوو هذا مختصر بسيط على ليلة القدر، أعاننا الله و إياكم على العمل الصالح فيها. ❤️