فائدة الصدقة المستحبة
.png)
هضرنا لحد الٱن على انواع مختلفة ديال الزكاة الواجبة، و ليوم غاادي نهضروا على الصدقة بصفة عاامة و الفوائد ديالها.
الصدقة هي حاجة لي أكد الله عليها و النبي فأوقات مختلفة. مثلا، كااين فسورة البقرة الٱية 280: «و أن تصدقوا خير لكم إن كنتم تعلمون».
و النبي صلى الله عليه سلم قال: «سبعة يظلهم الله في ظله يوم لا ظل إلا ظله ...» و من ضمن هاد السبعة هو شي شخص لي عطا صدقة و خبعهاا لدرجة أن اليد ليسرية ديالو ماشاافتش شنو عطات اليد ليمينية.
هاادشي تيبين أن الصدقة ديال السر أحسن. كيما قال الله تعالى «و إن تخفوها و تؤتوها الفقراء فهو خير لكم». لاحقااش هكاا غادي تكون متأكد أنك بعيد على الرياء و العمل ديالك غادي يكون لوجه الله؛ مااشي بااش النااس يقولوا عليك رااك ظريف و تادير الخير.
الإستثناء الوحيد هو يلا كنتي تتعقد بأنك يلا عطيتي الصدقة و شافوها النااس هادشي غاادي يأثر عليهوم بشكل إيجابي و يخليهوم تاهوما يتصدقوا و يديرو الخير. و واخاا هكااك، خااص تكون متيقن فقلبك بلي رااك نتاا تتصدق لوجه الله.
و من بعد ماتصدق، ماترجعش عند داك الشخص و تبدا تمن عليه و تفكروا بلي راك تصدقتي عليه. حيت هكاا، تتبطل ديك الصدقة لي عطيتي بحال يلا عمرها ماكاانت.
و هاد الوقت لي حناا فيه ديال رمضان هو أحسن وقت فين تصدق. حيت معروف على النبي أن كاان 'أجود' الناس، يعني أكرم النااس و سخي بزااف، و كان فرمضاان سخي بزااف، كتر من الأياام الأخرى.
و الصدقة لي تتعطي للجيران و الأقارب ديالك حسن من الصدقة لي تتعطي لبرااني. الدليل هو قول الله تعالى: «و ٱت ذا القربى حقه» و كاين حديث ديال النبي: «الصدقة على المسكين صدقة، و على ذي الرحم اثنتان: صدقة و صلة». يعني عندك الأجر ديال الصدقة و الأجر ديال صلة الرحم.
و الأموال ديالنا - لي هي فالأصل ديال الله و الإنسان مستخلف فيها - فيها حق للسائل، و المحتاج، و الشخص المعسر (لمزير ماليا) و المقترض( لي بغاا يتسلف)، و الفقراء و المساكين بصفة عامة.
و هاادشي كولوا الهدف منو هو تقوية المسلمين و تخليهوم يعاونوا بعضياتهوم لوجه الله، بااش تاحد مايحس بلي رااه بوحدوا ولا رااه ضعيف.
غداا إن شاء الله غاادي ننتااقلوا لموضوع السااعة لي هو رمضان و أنهضروا على أحكام مختلفة، متعلقة بهاد الشهر المبارك.
بييييييس ✌️🐸
