1️⃣شروط زكاة البهيمة

الرااعي لي عندو بهيمة خاصوا يخرج عليها الصدقة. يلا كانوا 2 شروط متوفرين بعدا.

🔵 أولا، تكون البهيمة ديال مديورة للتناسل، اللبن، و الحليب و غير ذلك. أما يلا كانت البهيمة ديال العمل و الحرث مافيهاش الصدقة. 

🔵الشرط الثاني هو تكون ديك البهيمة تترعى. يلا كان مول ديك لبهيمة تيعلفها هو و تيخسر عليها فلوس العلف راسو، مافيهااش الصدقة. 

2️⃣زكاة الإبل

يلا كانت الشروط لي ذكرت متوفرة، تيخص الشخص يخرج الصدقة على الإبل، يلا كان النصاب حاضر. 

🔴يلا كان الراعي عندو 4 من الإبل، مايخرج والو. يلا كان عندو 5، يخرج عليهوم شاة واحدة. يلا كان عندو 10، يخرج 2. كانوا 15، يخرج 3. ويلا كان عند الراعي 20 من الإبل، تيخرج 4 ديال شياه ( خروفات ولا معزات). إما يخرج خروفات نيت ولا قيمتهوم لمالية كيماا قلنا لباارح. 

🔴يلا ولا عندو 25، ايخرج عليهوم بنت مخاض. (بنت مخاض هي الناقة لي كملات العام). يلا كان عندو 36، تيخرج بنت لبون. ( بنت لبون هي الناقة لي دارت عاماين). يلا وصل عندو 46، تيخرج حقة ( ناقة لي دارت 3 سنين). يلا كان عندو 61 من الإبل، تيخرج عليها جذعة (ناقة لي دارت 4 سنين). يلا كان عندو 76 من الإبل، تيخرج 2 بنتا لبون. ( 2 ناقات لي دارو عاماين). ويلا وصلاات 91 تيخرج عليها حقتان. (2 ناقات ديال 3 سنين).

3️⃣زكاة البقر 

نفس الشيء بالنسبة للبقر، يلا كانوا الشروط متوفرين، تيخص لواحد يخرج عليها الزكاة يلا وصلات النصاب. 

البقر تيخصوا يوصل ل 30 بقرة بااش تخرج فيه الزكاة. و يلا وصل لهاد العدد (النصاب) تتخرج "تبيعة" (بقرة ولا عجل لي كمل عام). و يلا كان عند الراعي 40 بقرة، تيخرج عليهوم "مسنة" ( بقرة لي كملات عامااين )

4️⃣زكاة الغنم

نفس الشيء تينطبق على الغنم، تيخص يكونوا الشروط و يوصل النصااب. 

🔴نصااب الغنم هو 40. يلا الراعي عندو 40 ديال الغنم، تيخرج عليهوم إما خروفة لي عندها عام، ولا خروف لي عندو 6 أشهر. يلا كان عندو 39، ماتيخرج عليهوم والو. 

🔴يلا كان عند الراعي 121 ديال الغنم، تيخرج عليهوم شاتان. 

🔴ويلا وصلاات ل 201 ديال الغنم، تيخرج عليها 3 ديال الشياه. من بعد يلا كتر الغنم، تتخرج على كل 100 ديال الغنم، شااة وحدة. يعني = 400 ديال الغنم تخرج عليها 4؛ 500 ديال الغنم تخرج عليها 5، و هي غاادة. 

⚪للإشارة، هاد الزكاة لي غادي تخرج ماخاصش تكون فيها شي عيب. يعني شي خروف لي مهرس ولا عرج ولا كااين شي عيب. خااص ديك الشااة لي تكون اتخرج للزكاة، داايزة للضحية ديال العيد لكبير. ولا ماغاديش تقبل للزكاة. 

الإستثناء الوحيد هو يلا كان عندك گااع الغنم مهرس و مفرشخ، ديك السااعة اتخرج منو واحد لخروفة لي مهرسة و مفرشخة منهوم. 

أما يلا كان عندك الغنم زويين، ماتخرجش شي حااجة لي فيها عيب و تبغي تهنى منهاا فالزكاة. 

خلااصة:

الزكاة واجبة فالبهيمة كذلك على أنواعها يلا توفراات فيها 2 ديال الشروط، و وصلاات للنصااب (الحد القانوني الشرعي) لي خاص يكون بااش تخرج عليهوم الزكاة. 

ويلا وصلات المااشية لي عندك لداك النصاب ( داك الحد) تفكر قول الله تعالى: «يَا أَيُّهَا الَّذِينَ آمَنُوا أَنفِقُوا مِن طَيِّبَاتِ مَا كَسَبْتُمْ وَمِمَّا أَخْرَجْنَا لَكُم مِّنَ الْأَرْضِ ۖ وَلَا تَيَمَّمُوا الْخَبِيثَ مِنْهُ تُنفِقُونَ» و صدق من طيبات ما رزقك الله.  

غداا إن شاء الله غاادي نختموا الحديث على الزكاة. 

بييييس ✌️🐸