عندك شي صديق لي تااضحك فااش تتشوفوا من لبعيد؟ قبل حتى ماتهضر معااه تتشدك الضحكة غي بالشوفة فيه؟ 

كااين واحد الصديق سميتو عثمان دييما تيوقع ليا معااه هكاا. وااحد المرة، مااشي حتى تلاقيتو، غي كنت غاادي عندو للداار، و فااش وصلت للحيط ديال دارهوم، بديت تنضحك. أناا مزاال ماشفتوش گااع، و لكن بديت تنضحك. و مع الحيط من لفوق 🐸

السبب لي خلااني نضحك فااش قربت لدارو هو أنني مادوزتش لقليل مع دااك السيد كيما تنقولوا. دوزت معااه بزااف دياال الأياام و شبعناا ضحك بجوج. و فااش وصلت جهة داارو تفكرت گااع دااكشي لي دوزناا و بديت تنضحك. 

هاد القضية تتسمها "anchoring" ولا "trigger". بإختصاار، هي فااش تنربطوا فدماغنا واحد لحااجة مع واحد الشعور. و هاد التعريف ماوااضحش مزياان، و لكن ها مثاال لي غاادي يوضح كولشي. 

مثلا: كنت انا ويياه واحد المرة تنضحكوا على شي حواايج لي درناا، حتى طحنا بجوج للأرض و بقينا تنضحكوا حتى لهضرة مابغااتش تخرج. يعني كنت سعيد بزااف فديك الحاالة، كنت تنحس ب"شعور" زويييين بزااف. و شنو "الحااجة" لي خلااتني نحس بهاد الشعور؟ لحااجة هي عثمان. 

و تتوقع حتى فالأمور ( المشااعر ) السلبية. 

مثلا، هاد العاام كان عندي واحد القسم لي ماتنحملوش، و تنكره  الساعة و القاعة لي تنشوفهوم فيها. السبب هو الأساتذة لي قرااو شي تلاامد فيهوم لعام لفاايت عاودولي عليهوم و تا أنا فااش قريتهوم، لقيت بلي راهوم ولااد النااس بإمتيااز. صوو، عوتااني حسيت بواحد "الشعور" خاايب، و فاللحظة لي حسيت بداك الشعور، كنت تنشوف دوك التلاامد "الحااجة". و وليت فوق ماتنمشي نقريهوم، تنحس بدااك الشعور السلبي. 

و هذاا هو "anchoring" ولا "trigger". 

فااش تنكونو تنضحكوا ولا تنبكييو ولا غضبانين ولا تنحسوا بأي شعور لي قوي، دمااغنا تيبغي يعرف شنو السبب ديال هاد الشعور. 

تيبغي يعرف شنو لحاجة لي سببات هاد الشعور، بااش يلا كان الشعور زويين، دمااغناا يبقى ديما يقولنا دير هاد لحااجة بااش تفرح. و يلا كان الشعور خاايب، دمااغنا تيبغي يعرف السبب بااش يبعدناا على هااد لحااجة. يعني هاادشي كاامل للصاالح ديالناا. 

علااش تنعااود ليكوم هادشي كاامل؟

كااين 2 أسبااب:

1️⃣ السبب الأول هو نتوما عندكوم شي حواايج فحياتكوم لي فااش تتشوفوهوم، تتحسوا بالغضب و الستريس و القلق و الحزن و مجموعة ديال المشااعر السلبية غي هكااك، و هادشي ايعاونكوم تخلصوا من هاد القضية. 

2️⃣السبب الثااني هو يلا فهمتي كيفااش هادشي تيوقع فالدمااغ تقدر تخدموا لصاالحك بااش تشعر بالسعادة فالدقيقة لي تبغي فيها. 

و هاادشي لي غاادي نقوليكوم كيفااش تديروه فالبوسط الجااي. 

حيت أنا داك القسم لي كنت كااره فاللول، بدلت النظرة ديالي ليه و الشعور بااش كنت تنحس من جيهتو. و بإمكانكوم تبدلوا أي شعور سلبي لي طااغي على حياتكوم. 

و لكن قبل ماتبدلوا خااصك تعرف السبب ديالو. علييها داباا، فكر فشنو هي الوضعية لي تتخليك ماتبقااش فرحاان غي هكااك. 

وااش كااين شي واحد لي فااش تتشوفوا ماتتحملش رااسك؟ شي صديق؟ فرد من العائلة؟ شخص فالقراية ولا فالخدمة؟ أو يمكن شي بلااصة لي وقعاات ليك فيها شي حااجة خاايبة من قبل؟ 

كتب شنو هي و غاادي نكملوا لمرة الجااية فبوسط اخور على كيفااش تكون سعيد داباا و فأي وقت فحياتكوم. 

بييييييس 🐸✌️