فااش تتجي تنعس، تتبداا تفكر فگااع دااكشي لي دااز عليك؟

تتفكر گااع المشااكل لي عندك و تتبدا تقلب من جنب لجنب بااش تنعس و ترتااح شوييا، و لكن واالو؟

فاللخر حتى يلا نعستي، تتبقى تفيق 100 مرة فالليل و فاللخر تتكون عياان فااش تتفيق كتر من لي كنتي قبل ماتنعس. 

يلا هكاا حتى نتاا، قرا هاد لبوسط حيت ايعااونك تخلص من هاد المشااكل. 

هضرناا من قبل على كيفااش أن النعااس يقدر يزيد السعادة ديالك، و ليوما انهضروا على شنو تدير بااش تقدر تنعس بكري و تفيق و نتاا مرتااح. 💙

0️⃣نتاابه بشنو تتااكل: كااين بعض المأكولات و المشروبات بحال القهوة لي تتحيد النعااس، و حتى يلا نعستي ماغااديش تحس بالرااحة فااش تفيق. 

🔴الأطعمة لي خاصك تجنب هي: القهوة، ٱتاي، لموناضة، شكلاط، لقلي، لحاار، سكر بزااف، الأطعمة المعلبة، اللحوم الحمراء.

  و ماتااكلوش بزاااف قبل من النوم مباشرة حيت الجسم غادي يكون تيهضم لماكلة و ماغاديش ترتااح فاش تكون نااعس. 

1️⃣التزم بوقت معين: ختاار واحد الوقت معين لي غاادي تبداا تنعس فيه و تفيق فيه. فاللول، التزم بهاد الوقت حتى فالعطل و نهار الأحد، من بعد فاش يرجع نعاسك عادي تقدر تغيرو فالعطل و لويكاند. 

🔴السبب هو دمااغك غاادي يولف هاد الوقت و ايبدا يجيك النعاس بشكل تلقائي. 

2️⃣استغل السااعة قبل ماتنعس مزياان: السااعة قبل ماتنعس مهمة كتر من ديك اللحظة لي غادي تنعس. 

سااعة قبل ماتنعس، ساالي أي حاجة لي رااك تاديرها ديجاا بحال قراية، خدمة، هضرة مع النااس فمواقع التواصل الإجتماعي. من بعد دير داكشي ديال النظافة (تغسل سنانك، تدخل للطواليط ولا أي حاجة لي تادير ). من بعد رجع لبيتك و طفي الضوء و استرخى. 

🔴السبب هو خااصك فااش تجي لبلااصتك باش تنعس، تكون ديجاا حيدتي عليك أي حاجة لي تقدر تبقى تفكر فيها من بعد. 

3️⃣خوي عقلك: يلا كانوا عندك شي مشااكل لي مخربقينك فعقلك، شد ورقة و ستيلو. قسم الورقة للنص. فواحد الجنب، كتب المشكل - أو مشااكل لي عندك - فالجنب لااخور، كتب حلول لهاد المشكل. مااشي بالضرورة يكون حل لي بصح غاادي يهنيك من هاد المشكل، غي أي حااجة و صاافي لي تقدر تجرب بااش تخلص من هاد المشكل. 

🔴السبب هو دماغنا تيخااف من لحااجة لي مجهولة و لحااجة لي غاادي تسبب لينا الألم. و حيت المشاكل بطبيعتهوم، تيسببو لينا الألم. دماغناا غادي يبقى يفكر فحل بااش يحمينا من هاد الألم. و لكن يلا حنا رااسنا لقيناا حل، دماغناا غادي يحبس من التفكير و هادشي غادي يسااعدنا نعسوا. 

4️⃣شوييا ديال السعاادة: كتب فشي ورقة گااع الأمور لي نتا فرحاان بيهوم و حامد الله عليهوم. ولا غي فكر فيهوم فقط. 

🔴السبب هو الإمتنان تيحسن من جودة النوم، كيماا هضرنا عليها من قبل. 

5️⃣شويا ديال البرودة: حاول تنعس فشي بلااصة لي بااردة. ويلا ماكاانش عندك شي قدرة على أنك تختار فين تنعس ولا تنقص من حرارة الغرفة، نقص شوييا من لحوايج ديالك ولا لغطاا. 

🔴السبب هو الجسم تينقص من الحراارة ديالو فاش تيكون اينعس، يلا ساعدتيه على هاد القضية غاادي تنعس بسرعة. 

6️⃣تنفس مزياان: دخل النفس ل 2 ثواني من الأنف ديالك، و خرج النفس من الفم ديالك لمدة 4 ديال الثواني. تأكد بلي التنفس طالع من كرشك، مااشي غي من صدرك. 

🔴السبب هو التنفس بهاد الشكل تيعااون الجسم يرتااح بشكل أسرع. 

7️⃣ريااضة: دير السبور على قدر الإستطاعة ديالك. و غاادي تعاونك تنقص من الستريس و تحسن النعااس دياالك. 

8️⃣ماتنعسش بالنهار: يلا كنتي مرهق بزااف و كان خااصك ضروري ترتااح، ماتفوتش 20 دقيقة ولا 30 دقيقة گااع. و من الأحسن أنك تخلي حتى الليل عاد تنعس فخطراا. 

🔴السبب هو الجسم تيخصوا يوصل لواحد الدرجة ديال العياا بااش عاد يجيه النعااس. 

9️⃣حسب من 300 للور ب 3. حسب بهاد الشكل: 300-297-294-291-288 ....

🔴السبب هو ان لحسااب بهاد الطريقة غاادي صعيب و غاادي يخليك مركز معااه، و ماغاديش تقدر تفكر فشي مشكل لي مخربقك. زائد أنه ممل، و غاادي يجيب ليك النعااس دغياا. 

🔟تناابه للوضعية ديال نعااسك: مثلا، يلا كنتي تتنعس على كرشك بزااف، تقدر تفيق من نعاس حيت هاد الوضعية تتعدب. جرب انك تبدل طريقة باش تتنعس و شوف الوضعية لي غادي ترتاح فيها. 

🔴 السبب  شي مراات تيكون عدنا مشااكل ديال النوم غي حيت الوضعية بااش تنعسوا، تتكون غير مريحة للجسم و هادشي تيخلينا نفيقوا. 

#️⃣ شنو المشكل لي عندك؟ تعاامل معااه! يلا ماتيديكش النعااس، سول رااسك إمتاا هادشي بدااني؟ من بعد، سول رااسك، شنو المشكل لي وقع فداك الوقت؟ 

فاش تعرف المشكل لي وقع ليك، سول رااسك عاود: شنو لحااجة لي باغي؟ شنو خاصني بااش نرتااح؟ 

الجوااب ايكون هو أنك تعيش حيااة بدون داك المشكل. 

من بعد، قلب على شي حل بااش تخلص من داك المشكل، و فاش أتخلص منو غاادي تلقى بلي دمااغك ايرجع ينعس بشكل عاادي. 

🔴السبب هو قلة النوم هو نتيجة ديال شي مشكل لي عندك فحيااتك، و فااش أتخلص من أصل المشكل، غاادي يمشيو هاد الأعراض ديالو. 

هاد لمرة طولت عليكوم و لكن موضوع لي يستحق تطول عليه. 

و كيماا العاادة، ماتنسااوش أنكم تخدموا هادشي فحيااتكم من داباا للقداام. و ماتخليوش هادشي يكون غي شي معلومة لي تتقراوها فقط. 

و هكاا أتكونوا بديتو فأنكم تحكموا فالسعادة ديالكوم. 

أنشوفكوم لمرة الجااية فبوسط اخور على كيفااش تكون سعيد داباا و فأي وقت فحياتكوم. 

بييييييس 🐸✌️