عمرك فكرتي فالتأثير ديال الكلماات على المشااعر ديالك؟ 

الكلماات عندها واحد القوة عجيبة، يقدر إنسان يقوليك كلمة وحدة و يفرحك، يقلقك، يخليك غضبان، يبكيك، ولا يخليك تنسى هادشي كاامل. 

غي بكلمة وحدة. 

و لكن كااين حاجة أقوى من الكلمات لي تيقولو ليينا النااس، و هاد لحااجة هي لكلمات لي حناا تنقولو لراسنا. 

مثلا، شحاال هاادي كانت يلا وقعاات لييا شي حااجة خايبة تنقول "مصيبة" و كانت هاد لكلمة ديما فالفم ديالي. كنت تنخدمها يلا وقعات ليا شي حاجة كبيرة ولا صغيرة. 

و مع المدة لااحظت بلي راه وليت تنكبر أمور تافهين و تنعطيهوم كتر من قيمتها. و واخاا منطقيا كنت عاارف هاد لقضية، ماقديتش نحبس حيت كنت تنحس بلي داك المشكل كبيير بصح. 

و بإختصاار، السبب كان هو ديك لكلمة لي كنت تنقول "مصيبة". فااش تيوقع ليينا شي مشكل، تيبقى فينا الحال و تنحسوا بالألم، و لكن لحااجة لي تتحدد وااش انحسوا بالألم بزااف ولا لا هي الكلمات لي تنخدموا بااش نوصفوا داك المشكل. 

و مع المدة مابقيتش تنخدم ديك كلمة "مصيبة" و وليت تنقول "مسألة تافهة" و مابقيتش تنبالغ فرد الفعل. 

كلمة ثاانية لي حيدت من فمي هي "مكتئب". كنت فااش تتوقع شي حاجة خاايبة و تيسولني شي حد كيف راك دااير، تنجاوب بمكتئب. 

و حيت خدمت هاد لكلمة بزااف، تطبعات فييا و ولاات هي بااش تنحس. 

عارف بلي هاادشي تيباان بسيط و تاافه يمكن، و لكن جربوها. فكروا فشنو هي شي كلمة لي تتخدمو بشكل كبير فااش تتكونو مقلقين ولا معصبين و بدلوها بشي كلمة بسيطة و اتلااحظ الفرق فكيفااش اتحس مع المدة. 

و يمكن ليك تشوف حتى شي كلمة لي تتخدم فاش تتكون فرحاان و بدلهاا بشي كلمة لي اتباالغ فالفرحة و تخليك تحس بيها بشكل كبر. 

و بهاد التغيير البسيط/الرائع/المتميز/العبقري/الوااعر غاادي تكون نتاا تتحكم فالسعادة و الحزن ديالك بأحسن و أسرع و أفضل و أروع الطرق. 

و كيما العادة، ماتنسااوش أنكم تخدمو هادشي فحيااتكم من داباا للقداام. و ماتخليوش هادشي يكون غي شي معلومة لي تتقراوها فقط. 

و هكاا أتكونوا بديتو فأنكم تحكموا فالسعادة ديالكوم. 

بييييييس 🐸✌️