أهم الكتب فمجال الصحة النفسية وتطوير الذات
.png)
كتاب واحد يقدر يختصر عليك سنوات طويلة ديال المعاناة، التجارب، و الأخطاء لي ممكن تطيح فيها. حيت تيكون إنسان لي خدا من حياتو 10 سنين ولا 20 ولا 30 سنة و ربما كتر گااع باش يتعلم مجموعة ديال الأمور، و تيلخص ليك حياتو كاملة فكتااب لي يمكن ليك تقرااه فأسبوع ولا فقل.
و بااش نختصر عليكوم أنك مسألة إيجاد كتاب مناسب ليكوم، ختاريت ليكوم من كتر من 200 كتااب لي قريت فهاد السنوات الأخيرة، 15 كتااب فمجال الصحة النفسية، كل واحد فيهوم ايعاونكوم تجاوزوا مشكل معين.
1. كتاب Awaken the Giant Within ديال Tony Robbins: هاد لكتاب ايعاونك انك تطور راسك فجميع المجالات؛ ايعلمك كيفاش تحكم فحياتك، توضع أهداف و تحققها، و تحقق نجاح دائم فأي مجال من حياتك. هاد لكتاب طويل و لكن كاين نسخة منو لي أصغر تتسمى Reawaken the giant within و بجوج بيهوم تيستحقوا الوقت ديالكوم.
2. كتاب The Power of Now ديال Eckhart Tolle: هاد لكتاب ايعاونك تنسى الماضي و ماتحمقش راسك بشنو جااي. ايعلمك كيفاش تعيش فالحاضر بلا قلق و إكتئاب.
3. كتااب Feeling Good: The New Mood Therapy ديال David D. Burns: هاد الكتاب تيعلمك كيفاش تقضي على الإكتئاب و تحقق السعادة فحياتك. هاد لكتاب تيعتمد على العلاج المعرفي السلوكي و غادي يبين ليك العلاقة بين الأفكار ديالك و المشاعر ديالك، و اتعلم تقنيات ناجحة باش تحسن صحتك النفسية.
4. كتااب Feel The Fear and Do It Anyway ديال Susan Jeffers: هاد لكتاب ايعلمك المستويات تلاتة ديال لخوف لي كاينة و كيفاش تغلب على كل واحد. و ايعاونك تبني شجاعة، و مقاومة لأي مشكل واجهك فالحياة.
5. كتااب Learned Optimism ديال Martin Seligman: هاد لكتااب غاادي يعلمك كيفاش تكون إنسان متفائل بطريقة منطقية، ماشي التفاؤل فين تتكدب على راسك و تتقول بلي كلشي بخير واخا نتاا مدمر من لدااخل، و لكن تفاؤل حقيقي و تعامل مع أي مشكل واجهك.
6. كتااب Letting Go of Anger ديال Ron Potter-Efron: هاد لكتاب غاادي يشرح ليك كيفاش تخلص من الغضب بجميع انواعو، حيت كااين أنواع مختلفة ديال الغضب، لي عندها اسباب و حلول مختلفة.
7. كتااب Lost Connections: Uncovering The Real Causes of Depression ديال Johann Hari: هاد لكتاب تيشرح الأسباب الحقيقية ديال الإكتئاب و كيفاش تعالج نفسك منو، و تيبين علااش الأدوية ماعندها حتى شي فعالية و تيوضح لااش هي منتشرة.
8. كتااب Man's Search for Meaning ديال Viktor E. Frankl: هاد لكتاب تيحكي قصة لكاتب فمعسكر الإعتقال ديال اليهود. و من القصة ديالو تيبين أن الإنسان يقدر يتجاوز أقصى الصعوبات يلا تحكم فحاجة وحدة فقط.
9. كتااب Meditations ديال Marcus Aurelius: هذا إمبراطور روماني و تيحكي فالمذكرات ديالو الفسلفة لي عاش بيها حياتو - الفلسفة الرواقية - و فيها دروس و عبر مهمة فالحياة.
10. كتااب Overcoming Unwanted Intrusive Thoughts ديال Sally M. Winston و Martin N. Seif: يلا شي مرة كنتي تتهضر مع شي واحد و عقلك قالك ضربو، ولا بوسو ولا دير شي حاجة غبية بحال هكاك، ولا كان عندك شي أفكار لي تتهجم عليك بحال تأدي راسك، ولا أفكار جنسية، و كانت هاد الأفكار تتجي بشكل كثير و غير مرغوب فيه، هاد لكتااب ايعااونك تخلص منها.
11. كتااب Radical Acceptance ديال Tara Brach: هاد لكتااب تيعلمك حب النفس و كيفاش تقبل راسك بالعيوب ديالك باش تحقق السلام الداخلي. و فنفس الوقت، ايوريك كيفاش تخدم على دوك العيوب و تصلحها.
12. كتااب Rejection Proof ديال Jia Jiang: هاد لكتااب عبارة عن قصة الكاتب و المحاولات ديالو باش يتخلص من الخوف ديالو من الرفض. و فيه تقنيات بسيطة لي اتعاونك تخلص من هاد الخوف.
13. كتااب Self-Esteem: A Proven Program for Your Emotional Health ديال McKay و Patrick Fanning: هاد لكتااب ايوريك كيفاش تبني ثقتك بنفسك.
14. كتااب Undoing Depression ديال Richard O'Conner: هاد لكتااب تيوريك شنو هوما الامور لي تتسبب الإكتئاب و كيفاش تعالج نفسك بدون أدوية ولا طبيب نفساني.
15. كتااب When Panic Attacks ديال David D. Burns: هاد لكتاب غادي يوريك كيفااش تخلص من نوبات الهلع و القلق عن طريق العلاج النفسي السلوكي.
أي كتااب من هادو غادي ينفعك و يعاونك أنك تحسن صحتك النفسية.
طيليشارجيهوم من هاد الرابط و إستمتع بالقراءة ديالهوم 👇👇
بيييييس ✌️🐸
