عَن أَبِي هُرَيْرَةَ رضي الله عنه أَنَّ رَسُولَ اللهِ ﷺ قَالَ: (مَنْ كَانَ يُؤمِنُ بِاللهِ وَاليَوْمِ الآخِرِ فَلْيَقُلْ خَيْرَاً أَو لِيَصْمُتْ، وَمَنْ كَانَ يُؤمِنُ بِاللهِ وَاليَومِ الآخِرِ فَلْيُكْرِمْ جَارَهُ، ومَنْ كَانَ يُؤمِنُ بِاللهِ واليَومِ الآخِرِ فَلْيُكْرِمْ ضَيْفَهُ) رواه البخاري ومسلم.

🟢هاد الحديث تيهضر على الٱداب الإسلامية الواجبة و هوما 3 في هذا الحديث. 

🔵 شرح الحديث: 

1️⃣أولا، حفظ اللسان. الإنسان قبل مايتكلم، خاصوا يفكر فشنو باغي يقول، و يلا باان ليه بلي ماكاين تا شي ضرر فداكشي لي ايقول و فيه شي فائدة و منفعة يقولها، و يلا ماكانتش منفعة و كان غي ضرر، الصمت تيكون أفضل. 

تيكون أفضل لأن الإنسان مسؤول و غادي يتحااسب على شنو تيقول. و مذكور فالقرٱن فسورة ق، الٱية 18 { مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ} و فحديث ٱخر ديال النبي صلى الله عليه و سلم مذكور «يكُبُّ الناسَ في النار على وجوههم - أو قال: على مناخرهم - إلا حصائدُ ألسنتهم» بمعنى أنه راه اللسان ديالنا قادر يجرنا للهاوية. 

2️⃣ثانيا، إكرام الجار. فحديث معروف للنبي صلى الله عليه و سلم قال: ( ما زال جبريل يوصيني بالجار حتى ظننت أنه سيورثه )

و إكرام الجار تيكون بأنك ماتأذيهش وتأدي الحقوق ديالو عليك فحسن الجوار، خلق محبة بيناتكوم، تستر العيوب ديالو، تساعدو يلا حتاجك و توقف معاه فالمرة و الحلوة. 

3️⃣ثالثا، إكرام الضيف. هادي مسألة لي ديجاا كانت عند العرب من قبل حتى قبل نزول الوحي على النبي، و الإسلام أكد على هاد الخصلة. 

و إكرام الضيف بطبيعة الحال دااخل فيه الطعام لي تتقدم ليه فاش تيجي عندك، و لكن فيه أمور أخرى بحال حسن المعاملة، الإبتسامة، و غيرها. 

كاين أخلاق ديال الضيافة بالنسبة للضيف و المستضيف لي خاصنا نهضروا عليها. 

بالنسبة للضيف، أولا ماتعيقش. ثانيا، ماتعيقش. الواجب فالضيافة هو ليلة و نهار، ويلا زاد الشخص على ثلاثة أيام خاصوا يستأذن من المضيف ديالو باش مايكونش متقل عليه. و ماخاصش داك الضيف يخرج أسرار البيوت و أي أمور عائلية لي اطلع عليها. 

بالنسبة للمستضيف، خاصوا يعيط على الناس الأتقياء و الصالحين، و تدعي لدارك الناس بغض النظر على واش غني ولا فقير، و يستقبل ضيوفوا فالباب و باختصار يخليهوم يحسوا بالترحاب. 

4️⃣فالأخير، هاد الحديث ماتيعنيش بلي الإنسان يلا مادارش هادشي، راه صاافي ماشي مؤمن ولا شي حااجة بحال هكاا. هنايا النفي ديال الكمال. 

بمعنى، يلا بغيتي تكون مسلم و مؤمن 'كامل' على حقك و طريقك، خااصك تهتم بهاد الٱداب باش الإيمان ديالك يتزااد. 

انتهى، ملخص من شرح إبن عثيمين، الإمام النووي، الإمام إبن دقيق العيد، و موقع إسلام ويب.

موعدنا غدا مع الحديث السادس عشر إن شاء الله.

دخل لهناا باش تقرى شرح الحديث الرابع عشر "حرمة دم المسلم" 👇👇

الحديث الرابع عشر متى يهدر دم المسلم؟ (growbdarija.com)

بييييس ✌️