السبب لي تيخلي بزااف ديال الناس مكتئب، غضبان، مستريسي و غيرها هي أنه كااين شي حواايج لي تنقومو بيها و تتخلينا نحسوا بهاد المشاعر و الحالات ديال الغضب و غيرها.

شي مراات تنقومو بيها بلاا مانحسوا حيت تتكون عادات خديناها من الطفولة ديالناا، و شي مراات تتكون امور لي تنديروها عن وعي، حناا عارفيين راسنا تنديروها، و تيصحاابنا ان ديك العادات تتساعدنا نتعاملوا مع المشاعر ديالنا.

و لكن فالواقع رااه العكس، و فاش اتخلص منهاا غاادي تحس بواحد التغيير كبير فحالتك النفسية. و هاد العادات أنقسموها لجوج مجموعات:

🔵المجموعة الأولى هي عادات لي تتضمن كبت المشاعر. و التجاهل ديالها. و فيها:

1️⃣السلوك العدواني السلبي: و هااد العادة هي فااش حنا تنخبيو المشاعر السلبية لي تنحسوا بيها تجاه شخص اخور. و لكن تنديرو شي حواايج من تحت الدف بااش نتااقموا من داك الشخص.

مثلا: داابزتي مع شي وااحد ولا قاليك شي هضرة ماعجبااتكش و بلااصة ماتقوليه مباشرة بلي ماعاجبكش لحاال، تاتقوم بشي سلوك عدواني بحاال تبداا تنتااقدوا على شي امور بعيدة على دااكشي دابزتوا عليه.

ولا تسكت و ماتبقااش تهضر معااه، و فاش يقولك وااش مقلق ولا شي حااجة، تقوليه لاا و لكن تبداا تشوف فيه شوفات ناقصين، تحشي ليه لهضرة، ولا ماتديرش شي حااجة لي طلبها منك.

نتاا هناايا تتقوم بواحد السلوك عدواني و لكن سلبي بمعنى غير مباشر، من تحت الدف. ماتتهضرش مع بنادم، تتقلب عليه، تتنفخ و غيرها.

🔴علااش هاادي خاايبة؟

هااد العادة تتمنعك من أنك تواصل مع بنادم بشكل صحي. تتخليك ديماا حااقد و غضباان من لدااخل. زاائد تتبينك برهوش و عمرك ماتاتخد داكشي لي بااغي.

🔵شنو الحل؟

الحل هو انك نتاا تبداا تهضر على راسك يلا ماعجبااتكش لحااجة بطريقة مباشرة وبلاا خوف. اتجيك صعيبة فاللول و لكن من بعد اترتااح كتر فااش تولف انك تهضر على رااسك.

2️⃣المماطلة أو التسويف: بإختصاار هادي هي فااش تتأجل التعامل مع المشاعر السلبية.

كنتي غضبان ولا مقلق، تتقول من بعد و نتعاامل معاها.

🔴علااش هادي خايبة؟

شحاال ماأجلتي التعامل مع المشاعر السلبية شحاال ماغادي يكبروا و يصعب عليك التخلص منهوم من بعد.

🔵شنو الحل؟

الحل هو أنك تواجه المشاعر السلبية ديالك و تبع النصائح لي قلنا فالفصل الثالت بسرعة. و تقدر حتى أنك تكتبهوم، تعاودهوم لشي حد، ولا فقط تخلي رااسك تحس بيها داباا و ماتبقااش تأجلهوم.

3️⃣تشتيت الإنتباه: هضرنا على هاادي من قبل فالفصل الثاني. هي طريقة سلبية ديال التعامل مع المشاعر. فااش تتحس بشي شعور ولا تفكر فشي حااجة لي مقنطاك، تتجاهلها و تاتتلهي راسك بأمور بحاال لخدمة، لماكلة، المخدرات، التلفازة، سوشال ميديا.

🔴علااش هاادي خاايبة؟

هاادي كلشي تيديرها الصراحة و تتنفع فالمدى القصير، و لكن ماتتعالجش المشكل فالمصدر ديالو. صوو، المشكل غاادي يرجع و تقدر كنتيجة يولي عندك شي إدمان على لماكلة، المخدرات، ولا اي حااجة لي نتاا تتقوم بيهاا بااش تخلص من دوك المشاعر الغير مريحة.

🔵شنو الحل؟

الحل بالطبع هو تعامل مع المشكل كيما ذكرنا فالفصل الثالث و الرابع. زائد، أنك تلقى طرق إضافية باش نتعاملوا مع المشاعر مثل الرياضة، التأمل، قراءة القرٱن و أمور لي واخا تولي مدمن عليها، ماغاديش تضرك.

4️⃣إجترار الأفكار: هاادي هي فااش عقلك ماتيحبسش من التفكير فشي مشكل لي وقع و تتبقى تخاايل سيناريوهات لي كان ممكن توقع. و تتقول "كون غي درت هاادي، كون رااه كاانت شي نتيجة مختلفة."

🔴علااش هاادي خاايبة؟

هاادي من ضمن الأمور لي تتأدي للقلق و الإكتئاب. و تتخليك فوسط المشكل و بعيد على الحل.

🔵شنو الحل؟

الحل هو أنك تعطي لرااسك وقت محدد فين تفكر فالمشكل و موراها تحبس. عطي لرااسك 5 دقايق ولا ساعة ولا نهار. المهم هو تختاار وقت لي غاادي تلتاازم بيه.

حل اخور هو انك تركز على اللحظة لي نتا عايش فيها و تعرف بلي مايمكنش ليك تغير الماضي. حاول تلقى شي حل يلا كان، و يلا ماكاانش دووز.

و حااول تشوف الجاانب الإيجاابي فلحااجة لي وقعاات. و كون ممتن ليها، حيت بصح أي حااجة فييها خير.

انشوفوا فالبوسط الجاي الجزء الثاني من العادات السلبية.

دخلوا لهاد الليان باش طيليشارجيو كتااب ""الذكاء العاطفي بالدارجة" و توليو قادريين أنكم تفهموا المشاعر ديالكوم، و تعرفوا كيفااش تحكموا فيهوم و تغيروا حياتكوم. 👇👇

https://drive.google.com/ الذكاء العاطفي بالدارجة - أيوب الهرشال

بييييس ✌️🐸