بزااف ديال النااس تيفضلوا أنهم يخبعوا المشااكل و المعاناة النفسية ديالهوم لراسهوم.

تقدر تكون نتاا هكاا حيت ماتتبغيش تقل على بناادم، ماتتبغي تا شي وااحد يشفق عليك و لا غي تتقول بلي ماكااين تا شي فاائدة و سبب لي يخليك تعااود و تخوي قلبك على نااس لوخرين. تا اناا كنت تنفكر هكاا و شي مرات بصح تنخبع باش تنحس.

و لكن من ضمن الأمور لي غادي يعاونوك أنك تعامل مع المشاعر ديالك بشكل حسن هي انك تواصل مع الناس. و كااين عادات بساط لي انشوفوا لي اتعاونك توصل المشاعر ديالك للناس بطريقة سليمة بلا ماتقل على اي حد.

1️⃣العادة الأولى: التعبير على المشاعر

ماتخافش من انك تقول "مااشي بخير" ولا "مقلق" يلاا شي وااحد سولك كيف رااك دااير! و لا حتى أنك نتاا تقول للناس فحياتك بلي رااك دايزة من فترة قااصحة.

🔵علااش؟

تتمنع انك تخبي المشاعر فقلبك، تتعاونك تفهم باش تتحس و مناياش داايز كتر، حيت باش تعاود لشي حد كيف راك داير، خااصك تفكر فيها قبل، و تتقوي علاقتك مع الناس.

🔴بقا ديما تكون صريح مع صحابك و العائلة يلا ماكنتيش بخير. و تقدر تكتب فتيلي ولا مذكرات على حالتك النفسية فأي وقت.

2️⃣العادة الثانية: طلب المساعدة

هاادي بحال العادة الأولى تقريبا. فااش تاتعاود باش تتحس لشي شخص، طلب منو المساعدة على قدر المستطاع.

🔵علااش؟

حيت كااين شي امور لي ماتقدرش تعالجها بوحدك و تيخصك صديق لي يكون معاك و يساعدك، و أقل حاجة يعطيك نصحية و كيفاش هو كان يتعامل مع المشكل يلا كان بلااصتك.

🔴فكر فشي عدد ديال الناس لي تقدر تواصل معاهوم فاش تكون محتاج مساعدة. و دير حدا إسم كل واحد نوع المساعدة لي يقدر كل واحد فيهوم يقدم ليك.

🔵علااش؟

حيت فااش تكون مستريسي و ضاايقة بيك الدنياا، اتجبد هاد اللائحة و اتحس بشوييا ديال الراحة حيت اتعرف بلي نتا ماشي بوحدك و كاين لي ايسااعدك تخرج من هاد الضيق و المشكل لي فيه.

3️⃣العادة الثالتة: وضع حدود

يلا كنتي من النوع لي ديما تيعاون الناس، تقدر تنسى واحد لحاجة مهمة: رااسك.

تقدر تنسى أنك حتى نتا إنسان و خاصك تهتم بصحتك النفسية. و خاصك توضع حدود مع أي إنسان لي مامزيانش لصحتك النفسية.

مثلا: يلا كان شي إنساان لي 'حاقد' على لبلاد، على حياتو، على المستقبل و فاش تتلاقا بيه تتحس بالإكتئاب و تتمرض فراسك. ايخصك تبعد عليه.

🔵علااش؟

حيت النااس لي فحياتنا تيعلبوا دور كبير فصحتنا النفسية. يلا كانوا الناس لي فحياتك تيشجعوك، غاادي تكون إنسان سعيد، و يلا كانوا تيحطموك، غاادي تعيش فالستريس و الضغط.

🔴دير لائحة ديال الناس لي غادي تحيد من حياتك، ويلا كانوا قراب بزااف بحال الواليدين، بدا دوز معاهوم وقت قل.

🔴 تعلم تقول لاا لأي حاجة مامرتااحش ليها بلا ماتبرر راسك، إلا مع ناس لي مهمين فحيااتك.

🔴 و ديماا خلي رااسك نتا هو الأولوية فحيااتك.

⚪هادوا أهم العادات لي اتعاونك تعامل مع المشاعر ديالك فعلاقة مع الناس لوخرين. فالبوسط الجااي، انتعلموا كيفااش نتعاملوا مع المشاعر و نطوروا راسنا فنفس الوقت.

دخلوا لهاد الليان باش طيليشارجيو كتااب ""الذكاء العاطفي بالدارجة" و توليو قادريين أنكم تفهموا المشاعر ديالكوم، و تعرفوا كيفااش تحكموا فيهوم و تغيروا حياتكوم. 👇👇

https://drive.google.com/ الذكاء العاطفي بالدارجة - أيوب الهرشال

بييييس ✌️🐸