1️⃣ تعريف الحديث الضعيف

أولا، العلماء قسموا الحديث الضعيف لبزااف ديال الأنواع، و شي وحدين قال أنه كاين 49 نوع ديال الحديث الضعيف. و لكن حناا غاادي نبسطوا الأمور و نشوفوا التعريف العام للحديث الضعيف و شنو لي تيخليه ضعيف.

و من ضمن التعاريف ديال الحديث الصحيح، كااين: "هو الحديث الذي اختلّ فيه أحد شروط الحديث الصحيح أو الحسن، وتختلف درجة ضعفه باختلاف اختلال الشروط".

و قال ابن الصلاح: "هو كل حديث لم تجتمع فيه صفات الحديث الصحيح ولا صفات الحديث الحسن". و قال ابن دقيق العيد: "هو ما نقص عن درجة الحسن". و الأمور لي تتخلي حديث ضعيف بالضبط هي:

🔵 مشكل فالسند

🔵 مشكل في عدل و ضبط الرواة

🔵 مشكل في متن الحديث

2️⃣ مشكل فالسند

أول حااجة لي تتخلي الحديث ضعيف هي وجود مشكل فالسند، أي فالسلسلة ديال رواة الحديث. و هاد المشكل يقدر يكون إما إنقطاع فالسلسلة ديال الرواة، زعما شي راوي نااقص ولا كتر ولا شي رااوي لي ماشي ثقة.

تخايلهاا بحال شي سنسلة لي شاادة لباطو، يلا كانت شي حلقة من ديك السنسلة ضعيفة ولا مصدية ولا مهرسة، ديك السنسلة كاملة غاادي تكون ضعيفة و ممكن لبااطو يطيح.

3️⃣ مشكل عدل و ضبط الرواة

المسألة الثانية لي تقدر تخلي الحديث ضعيف هي أنه دوك الرواة ديال الحديث مايكونوش ثقة فالأخلاق ديالهوم و يكونوا معروفين بالكذوب ( العدل) ولا يكونوا معروفين بأن الذاكرة ديالهوم ضعيفة و يكونوا تيرتكبوا أخطااء بزااف ( الضبط). هااد جوج حواايج تتخلي الحديث ضعيف.

4️⃣ مشكل في متن الحديث

المسألة الأخيرة لي اتخلي الحديث ضعيف هي يكون فيه شي علة ولا شي شذوذ. كيماا قلنا من قبل، العلة هي شي عيب خفيف لي تيكون مخبع فالحديث. و الشذوذ هو يكون الحديث تيخالف القرٱن أو الأحاديث النبوية الصحيحة.

5️⃣ وااش هادشي تيعني أن الحديث الضعيف بدون فائدة؟

الجواب هو لا. داباا يلا كان شي حديث ضعيف لدرجة كبيرة و ضعيف لاحقااش الرواة ديالو معروفين بالكذب و الأخلاق ديالهوم زيرو، ديك السااعة، العلماء ماغاديش يهتموا بداك الحديث الضعيف ولا يستدلوا بيه و يخدموه فأي مسألة.

أما يلا كان الحديث ضعيف لاحقااش السند مامتااصلش ولا الرااوي معروف بلي الذاكرة ديالو ضعيفة، هناياا داك الحديث الضعيف ماتنجيوش و نرميوه فخطراا. لاحقااش العيوب لي خلاات داك الحديث ضعيف مااشي كبيرة بزااف، و فهاد الحالة العلماء تيستدلوا بيه، بالخصووووص يلا كان شي حديث اخوور لي حسن ولا صحيح و قريب ليه فالمعنى، ديك السااعة تا هاد الحديث الضعيف تيطلع گرااد، و تيزيد درجة و تيولي داايز.

و فااش تيدوز بالضبط؟ فالغالب تيستدلوا بيه ففضائل الأعمال بحال الصلاة و الصوم و غيرها. أما المسائل ديال العقائد و الأحكام الشرعية تيخص الحديث يكون إما صحيح أو حسن بااش يستدلوا بيه.

6️⃣ مثال

روى أبو داود (5096) من طريق شُرَيْح بن عبيد عَنْ أَبِي مَالِكٍ الْأَشْعَرِيِّ، قَالَ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: إِذَا وَلَجَ الرَّجُلُ بَيْتَهُ، فَلْيَقُلْ: اللَّهُمَّ إِنِّي أَسْأَلُكَ خَيْرَ الْمَوْلَجِ، وَخَيْرَ الْمَخْرَجِ، بِسْمِ اللَّهِ وَلَجْنَا، وَبِسْمِ اللَّهِ خَرَجْنَا، وَعَلَى اللَّهِ رَبِّنَا تَوَكَّلْنَا، ثُمَّ لِيُسَلِّمْ عَلَى أَهْلِهِ.

🟢 هذا الحديث ضعيف حيت كاين إنقطاع ما بين شريح بن عبيد وأبي مالك رضي الله عنه. و لكن واخا هكااك ممكن أن هاد الحديث يتوظف فااش نهضروا على فضل ذكر الله فدخول المنزل.

كان هذا شرح مبسط للحديث الضعيف. فالجزء المقبل غاادي نشوفوا شنو هو الحديث الموضوع.

دخل لهاد الليان، طيليشاارجي كتااب "علم الحديث بالدارجة"، و بدا الرحلة ديالك ففهم، إكتشااف، و الدفاع عن السنة 👇👇

تحميل كتاب "علم الحديث بالدارجة"