1️⃣ تعريف الحديث الموضوع؟

الحديث الموضوع هو أسوء و أشر نوع ديال الأحاديث. الحديث الموضوع هو حديث لي لا أساس له من الصحة، ممكن يكون تخلق عن قصد ولا بغير قصد و تنسب للنبي صلى الله عليه و سلم.

العلماء تيعرفوه على أنه الحديث المختلق المكذوب على النبي صلى الله عليه وسلم، ركب له إسناد أو جاء بغير إسناد. و كااين معايير و شروط لي تتساعد العلماء انهم يحددوا الحديث الموضوع، و هاد الشروط هوماا:

🔵 سند غير موثوق

🔵 شذوذ المتن

2️⃣ سند غير موثوق

قلناا قبل بلي فالحديث الصحيح تيكون عندك واحد السند متاصل ديال الرواة، شخص تيروي على الشخص لي قبل منو. و تيكونوا دوك الرواة معروفين بالأخلاق ديالهوم، و قدرتهوم على الحفظ. هاادشي كااين فالحديث الصحيح و الحسن.

أما الحديث الموضوع، تيكون داك السند غير موثوق. تيكونوا الرواة معروف عليهوم الكذب، أخلاقهم سيئة، مقترفين الكبائر، تيكون الحفظ ديالهوم ضعيف، و معروف عليهوم أنهم تيختلقوا الأحاديث لأهداف و مصالح شخصية. و حتى يلا كان الحفظ ديالهوم مزياان ماتيهمش حيت فالغالب تيخلقوا أحاديث لمصلحتهم الشخصية.

3️⃣ شذوذ المتن

المتن ديال الحديث تيكون غير منطقي، ضد تعاليم الإسلام لي مذكورة فالقرٱن ولا فالسنة الصحيحة. ممكن تكون شي حااجة سخيفة لي العقل ماتيتقبلهااش. و تيكون سااهل انك تعرفوا فااش تتفهم العقيدة، الفقه، و بعض الأسس البسيطة فالإسلام. تيبااليك ان داك الحديث رااه مااشي لوجييك.

4️⃣ منين تيجي الحديث الموضوع؟

تيجي لأسباب مختلفة. بعض النااس تيخلقوا أحاديث بااش يحققوا مصالح سياسية. بعض النااس تيخلقوا أحاديث موضوعة بسبب العصبية للمذاهب ديالهوم. كااين نااس لي تتخلق أحاديث مكذوبة على الرسول لي فيها التذكير بالجنة و الناار و تتقولك حنا تنديروا الأحاديث بنية حسنة بااش النااس يخافوا الله، و يرجعوا للطريق. كااين حتى بعض الناس تيخلقوا أحاديث موضوعة حيت السلاطين تيأمروهوم بيهاا و تيبغيو يرضيو دوك السلاطين فالدنياا.

بغض النظر على الأسباب لي تتنتج هاد الأحاديث الموضوعة، مهم أن حنا نعرفوهوم و نتخلصوا منهوم لاحقااش خاصنا نحافظوا على الدين ديالناا من الكذب و التزوير، و المعلومات الخاطئة، و من البدع لي هاد الأحاديث الموضوعة تتنتج.

5️⃣ مثال

كااين حديث تيكون منتشر فلفاايس بزااف لي تتلقى الٱلاف ديال النااس تتبارطاجيه للأسف، و هو: "من بلغ الناس بشهر رمضان حرمه على النار".

🟢 هذا حديث موضوع، مكدوب على النبي و ماكااين فحتى شي كتاب ديال الأحاديث من الكتب الستة او غيرها. و هذاا ماكااين حتى فالكتب ديال الأحاديث الضعيفة و الموضوعة المتعلقة برمضان. يعني هذا حديث لي شي شخص معين بسبب الجهل، اختلقوا. و الناس بسبب الجهل تاهوماا تينشروه بزااف. و هو حديث موضوع لا أساس له من الصحة.

كان هذا شرح مبسط للحديث الموضوع. فالجزء المقبل غاادي نتاقلوا لأنواع أخرى من الأحاديث حسب السند، و أنشوفوا شنو هو الحديث المسند.

دخل لهاد الليان، طيليشاارجي كتااب "علم الحديث بالدارجة"، و بدا الرحلة ديالك ففهم، إكتشااف، و الدفاع عن السنة 👇👇

تحميل كتاب "علم الحديث بالدارجة"