1️⃣ تعريف الحديث الصحيح

فااش تسمع حديث صحيح من داباا للقداام، تخاايلوا بحال علامة الجودة فالأحاديث، ولا علامة ذهبية. الحديث الصحيح هو أكثر حديث موثوق فعالم الأحاديث، لي فااش تسمعوا خودوا بعينيك مغمضين.

والتعريف التقني ديالو هو هذاا "الحديث الصحيح هو ما اتصل سنده بنقل العدل الضابط عن مثله إلى منتهاه مع السلامة من الشذوذ والعلة". و بااش ماتلفوش غاادي نقسموا هاد الحديث للعناصر و المعايير ديالوا، لي هوماا:

🔵 إتصال السند

🔵 عدالة الرواة

🔵 ضبط الرواة

🔵 عدم العلة

🔵 عدم الشذوذ

2️⃣ إتصال السند

تخاايل أنك مجمع مع العائلة نهار الأحد، و جدك مثلاا عاود قصة لخالك، و خالك عاودها لعمك، و عمك عاودها لبااك، و باك عاودها ليك. نتاا القصة فااش غادي تسمع القصة من لواليد دياالك، راه بحاال يلا سمعتيهاا من جدك لاحقااش كل واحد عااودها لشخص، حتى وصلاات ليك نتاا. فهاد الحالة السند متصل لاحقااش كل طرف تيوصل المعلومة لشخص اخر بدون إنقطاع. هذاا هو إتصال السند.

بااش الحديث يكون صحيح تيخص يكون عندو سند متصل. كل إنسان سمع الحديث مباشرة من عند الشخص لي تيروي عليه.

3️⃣ عدالة الرواة

ماكاافيش أنه كل شخص يكون سمع الحديث مباشرة من الشخص لي تيروي عليه، تيخص دوك الرواة يكونوا معروفين بالعدل لي شرحناا من قبل.

نرجعوا للقصة لي 'جدك' عاودهاا لخالك. نقولوا جدك رااجل كبير و بعقلوا ماتيكدبش، ايعااود القصة كيماا وقعات ليه ولا شافهاا. و لكن يلا كان خالك ولا عمك ولا بااك ربماا، تيزيد شي فيخراات، شي شوييا من رااسو، ديك السااعة القصة غاادي تبدل، حيت كل شخص فديك السلسلة لي تتعاود القصة، تيزيد من رااسو، ولا يمكن غي إنساان واحد لي تيزيد من رااسو. ماتيهمش. القصة داباا مابقااتش موثوقة. تيخص الرواة كيماا قلنا من قبل يكونوا معروفين بالعدل (الأخلاق و الدين و الصدق) في نقل الأحاديث.

4️⃣ الضبط

و هاد الرواة ماكافيش أنهم يكونوا صادقيين و صاافي، و لكن خاص يكون عندهوم واحد الذكاء و عقل كبير لي تيخليهوم قادرين أنهم يحفظوا المعلومات و ينقلوا الأحاديث بدقة.

تخايل رااسك بغيتي تطيب شي أكلة و خديتي الوصفة ديالهاا من عند شي صااحبك لي متقي الله و مافيهش لكدوب و عطااك الوصفة. داك الصديق غاادي يعطيك الوصفة من نيتو، مااغاديش يكدب عليك، و لكن ممكن يكون تينسى، و يعطيك داكشي نااقص، مااشي حيت هو كدااب ولكن غا حيت هو تينسى.

هادي حاجة مامقبولاش فنقل الأحاديث. تكون متقي الله شحال مابغيتي، و لكن يلا ماكنتيش إنساان لي عندو ذاكرة قوية، ماغاديش تقبل الشهادة ديالك و ماغاديش يكون الحديث صحيح.

5️⃣ عدم العلة

هاادي حااجة مهمة: بااش الحديث يكون صحيح ماخااصش تكون فيه شي علة. و العلة هي شي عيب خفيف لي يقد مايباانش.

بحاال يلا كنتي اتشري شي تيليفون جديد، و قبل ماتشريه لقيتي فيه شي ضربة فالزاجة خفيفة، تقدر تكون هي ماتتباانش بزااف، و لكن تتبقى مشكل، تتبقى علة، و تيبقى داك التيليفون مااشي جديد.

و نفس الشيء تينطبق فالأحاديث، العلة هي شي عيب خفيف فالسند ولا المتن لي ماتيباانش بشكل وااضح.

6️⃣ عدم الشذوذ

ٱخر حااجة هي أن المتن ديال الحديث - أي النص ديال الحديث - ماخااصوش يكون فيه شي مشكل، ماخاصش يكون شي شذوذ ولا تنااقض مع القرٱن ولا الأحاديث الصحيحة الأخرى.

تخاايل ديك القصة لي كان تيعااود جدك قال فيهاا بلي رااه نقز من السطح و جاا للأرض و بقاا بخير. وااش غاادي تيقوا؟ الجواب هو لاا. واخاا يكون خالك، عمك، و باك، كلهوم تيقولوا بلي رااه هادشي لي قال جدك و معروف عليهوم الصدق، اتبقى ديك لهضرة ضعيفة لاحقااش فيها تناقض مع اللوجيك. و حتى الأحاديث ماخااصش يكون فيهاا تنااقض مع الأحاديث الصحيحة و القرٱن.

7️⃣ مثال

حَدَّثَنَا الحُمَيْدِيُّ عَبْدُ اللَّهِ بْنُ الزُّبَيْرِ، قَالَ: حَدَّثَنَا سُفْيَانُ، قَالَ: حَدَّثَنَا يَحْيَى بْنُ سَعِيدٍ الأَنْصَارِيُّ، قَالَ: أَخْبَرَنِي مُحَمَّدُ بْنُ إِبْرَاهِيمَ التَّيْمِيُّ، أَنَّهُ سَمِعَ عَلْقَمَةَ بْنَ وَقَّاصٍ اللَّيْثِيَّ، يَقُولُ: سَمِعْتُ عُمَرَ بْنَ الخَطَّابِ عَلَى المِنْبَرِ قَالَ: سَمِعْتُ رَسُولَ اللَّهِ ﷺ يَقُولُ: إِنَّمَا الأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى، فَمَنْ كَانَتْ هِجْرَتُهُ إِلَى دُنْيَا يُصِيبُهَا، أَوْ إِلَى امْرَأَةٍ يَنْكِحُهَا، فَهِجْرَتُهُ إِلَى مَا هَاجَرَ إِلَيْهِ

🟢 هذا حديث صحيح لاحقاش فيه الشروط لي قلنا: السند متصل، السلسلة ديال الرواة قوية، معروفة بالعدل و الضبط ديالها، ماكاين حتى شي عيوب فيه، و ماتيتعارضش مع أي نص قرٱني ولا مع شي حديث صحيح اخور.

كان هذا شرح مبسط للحديث الصحيح. فالجزء المقبل غاادي نشوفوا شنو هو الحديث الحسن.

دخل لهاد الليان، طيليشاارجي كتااب "علم الحديث بالدارجة"، و بدا الرحلة ديالك ففهم، إكتشااف، و الدفاع عن السنة 👇👇

تحميل كتاب "علم الحديث بالدارجة"