شنو هو علم الحديث؟

1️⃣ تقديم

أكيد كلناا عارفين بلي القرٱن هو ركيزة الدين الإسلامي، هو مصدر التشريع الأول، هو معجزة خالدة، هو الكتاب السماوي الوحيد الخالي من التحريف. و لكن كااين مصدر تشريع ثاني فالإسلام لي لايقل أهمية، و هاد المصدر هو 'الأحاديث النبوية'. الصحابة رضي الله عنهم اهتموا بالأحاديث النبوية و بدلوا مجهود كبير باش توصل لينا، هوما و التابعين، و العلماء لي جمعوا الأحاديث فكتب مختلفة. و حناا غاادي نااخدوا فكرة على العلم لي تيدرس الأحاديث، و تيسميوه ب "علم الحديث" او "علم مصطلح الحديث".

2️⃣ شنو هو علم الحديث؟

الحديث بعداا هو أي قول، فعل، ولا صفة لي تضاافت على النبي صلى الله عليه و سلم. و علم الحديث كيماا الإسم تيبين هو العلم لي تيدرس الحديث، و العلماء تيقسموه لجوج أنواع: علم حديث دراية، و علم حديث رواية.

🟠علم الحديث رواية تنقصدوا بيه هو البحث فالأحاديث من ناحية المضمون، من ناحية اللفظ، تيجمع الرواياات و الأحاديث لي تقالت على النبي، المعنى ديالوا و المقصد ديالوا. مثلا، كتااب صحيح البخاري دااخل فهاد النوع لاحقااش هو مهتم بأنه يجمع ليك الأحاديث باللفظ ديالهاا.

🟠أماا علم الحديث دراية تنقصدوا بيه القوانين و القواعد لي تتخلينا نحكموا على الحديث واش صحيح ولا لا. علم الحديث دراية هو لي تيشوف واش الصحابة لي تناقلوا الحديث ثقة ولا لا، واش كااين شي علة (شي مشكل زعما) فالحديث، واش فيه شدود. هااد العلم هو لي تيحدد واش الحديث يكون صحيح ولا لا. و حناا غاادي نشوفوا إن شاء الله القسمين بجوج.

3️⃣ علااش خاصناا نقرااو علم الحديث؟

🔵 أولا، بالنسبة لييا، طلب العلم مهم - و فريضة - على كل مسلم. خصوصاا فهاد الوقت لي كتروا فيه الشبهات و أعدااء الإسلام. الإنساان خاصوا يكون قااري على الدين ديالوا بااش يقدر يداافع عليه.

🔵 ثانياا، الله تعالى امرنا بطاعة نبيه. يقول الله تعالى: {وَأَطِيعُوا اللَّهَ وَأَطِيعُوا الرَّسُولَ فَإِنْ تَوَلَّيْتُمْ فَإِنَّمَا عَلَى رَسُولِنَا الْبَلَاغُ الْمُبِينُ} التغابن/12. و الطاعة ديال الرسول تتجي من السنة الصحيحة.

🔵 ثالثا، تتقدر تدافع على راسك من الشبهات. الإنترنت عاامر بالأحاديث المكدوبة و تتنشر كتر فرمضان. تيخصك تكون قاري على الحديث باش تقدر تميز الحديث الصحيح من الضعيف، و تعرف كيفااش تبحث فاش تبغي تعلم الدين.

🔵 رابعا، تتحس برااسك بنيتي واحد العلاقة بينك و بين النبي صلى الله عليه و سلم. فااش غاادي تقراا الأحاديث، تفهم كيفااش وصلات ليينا، أتقدر الجهد لي تداار باش توصل ليك هاد الأحاديث و أتحس بيهاا بشكل مختلف على كيفااش كنتي تتحس فاللول.

🔵 خاامساا، غاادي تقوي الإيماان ديالك بالله و برسوله. الإيماان تيقوى و تيضعف مع الأعماال الصالحة، و الذنوب؛ و مع العلم ديالك. شحاال ما قريتي كتر، شحاال ماتيقوى الإيماان دياالك.

هاادوا بعض الفوائد و المقاصد لااش غاادي ندرسوا علم الحديث مجموعين. و فالجزء المقبل، غاادي نهضروا على العلاقة ما بين القرٱن و الأحاديث.

دخل لهاد الليان، طيليشاارجي كتااب "علم الحديث بالدارجة"، و بدا الرحلة ديالك ففهم، إكتشااف، و الدفاع عن السنة 👇👇

تحميل كتاب "علم الحديث بالدارجة"