1️⃣ تقديم

كيفااش تيعرفوا العلماء واش رواة الحديث مقبولين و صادقين ولا لاا؟ هااد المعرفة تتجي من مجموعة ديال الشروط لي دايرينها على الرواة.

كناا قلناا قبل أن الراوي بااش يتقبل، خاصوا يكون متوفر على مجموعة ديال الشروط. اول شرط هو العدالة: و المقصود بيهاا أن الشخص يكون مسلم، بالغ، عاقل، سليم من أسباب الفسق و خوارم المروءة. و الشرط الثاني هو الضبط: أن الراوي يكون معروف بالحفظ ديالو، يكون شخص دكي، مايكونش تيخاالف رااوي اخور لي معروف ليه بالصدق و الضبط. و تيحكموا العلمااء بالضبط على هاد الراوي من خلال الجرح و التعديل.

2️⃣ شنو المقصود بالجرح و التعديل؟

• الجرح هو واحد الإنتقااد سلبي، شي عيب فالشخص بحال الكدب، إقترااف الذنوب و المعاصي، ضعف الذاكرة، كترة النسياان، ولا شي عيب فالدين اخور.
• عوتااني التعديل هو فااش تنشهدوا للشخص بشي صفة إيجاابية. هو فااش تنأكدوا أن الشخص بصح تقة، ماتيكدبش، عندو داكرة قوية، ماتيقومش بالفوااحش، و الرواية ديالو فالحديث ماتتعاارضش مع كلاام الرواة الموثوقين.

3️⃣ علااش هادشي مهم؟

تخاايل أنك تتقراا كتااب و تلقى فيه واحد الملحوظة بلي ديك الشخصية ولا الراوي كدااب، وااش غادي تيق بداكشي لي قريتي؟ الجوااب هو لاا. يلا كاانت سي صفحة فلفاايسبوك تتلوح شي أخباار، و ديك الصفحة معروفة بالكدوب ولا النااس فالتعاليق تيقولو "كدووب"، وااش غاادي تيق بداك الخبر؟ عوتااني الجوااب هو لاا. 🙅🙅

و هذاا هو الجرح و التعديل، هو طريقة بااش تيقيموا العلمااء وااش شي رااوي تقة ولا لا. و هاادشي الهدف ديالو هو الحفااظ على السنة النبوية من التزييف.

4️⃣ كيفااش تيتعرف أن شي رااوي ثقة؟

داباا العلماء تيعطيو إماا علاامة إيجابية (التعديل) ولا سلبية (الجرح) على شي رااوي. يلاا كاانوا غاادي يعطيو علاامة سلبية، تيخصهوم يقولوا علااش. تيقولوا بلي هاد السيد هذاا عطينااه علاامة سلبية لاحقااش راه باان عليه الكدوب، لاحقااش الذااكرة ديالو ضعيفة، لاحقااش تيخاالف بزااف ديال النااس لي معروفين بالصدق. يعني يلا كنتي اتنتقد شي إنساان، خااصك توضح علااش بااش الناس و العلماء يتأكدوا انه يستااهل ديك العلامة السلبية.

أماا يلا كانوا غاادي يعطيوه علاامة إيجاابية، ديك السااعة مااشي ضروري تقول علااش لأنه كااين بزااف ديال الأمور لي تتخلي الإنساان تقة، و يلا جيتي تقولهاا كااملة ماغااديش تساالي. اتبداا تقول وا هاد السيد عطينااه علاامة إيجابية لاحقااش: عمروا ماكدب، تيلصي، تقة، عمروا مادار هاد المعصية، عمروا ماداار هاادي، و ماغااديش تساالي.

و العلمااء تيشوفوا هادوا بجوج: تيشوفوا الإنتقادات السلبية و الإيجاابية لي عند شي راوي بااش تيحددوا واش ثقة ولا لا، و وااش داك الحديث صحيح.

5️⃣ شكون لي تيقيم هاد الرواة؟

فااش تنقولوا أن العلمااء تيشوفوا الإنتقادات السلبية و الإيجاابية لي عند شي رااوي، تيعني أن شي وااحد تيعطي هاد التقييمات. و لي تيعطي هاد التقييمات تيكون تا هو عالم لي فيه شروط معينة، بحال أنه خاصوا يكون فاهم هاد الجرح و التعديل و القواعد المختلفة ديالو، تيخصوا يكون متقي الله و مايظلم تا وااحد، صاادق، مايكونش متعصب لأي شخص ولا منحااز ليه.

🟢 كاان هذاا شرح مبسط لمفهومي الجرح و التعديل. فالجزء المقبل، غاادي نتعرفوا على بعض الرواة الثقات في الإسلام.

دخل لهاد الليان، طيليشاارجي كتااب "علم الحديث بالدارجة"، و بدا الرحلة ديالك ففهم، إكتشااف، و الدفاع عن السنة 👇👇

تحميل كتاب "علم الحديث بالدارجة"