عمركم دزتوا من هاد التجربة … تتكون فالمسجد تتصلي و مور الصلاة تيبدااو دوك الأذكار الجماعية و تتعاودهوم مع الناس و تتحس بواحد الرااحة فشكل؟ ولا حتافلتي ب'المولد النبوي' و حسيتي بواحد الحب للنبي و إخلاص فقلبك؟ و حسيتي ب'طعم العبادة'؟؟

يلا كان الجواب ديالك هو "نعم" لأي سؤال من هاادو، نبغي نقوليك أولا بلي أنا ماتنشكش فالنية ديالك ولا الحب ديالك لهاد الدين. و لكن لي نبغي نقولك و نبغيك تسمعوا هو واحد التحذير لي أعظم رجال هذه الأمة - السلف الصالح - عاشوا بيه و عرفوا القيمة ديالو.

شي مراات ديك الطريق لي تنبغيو و تنحسوا بلي فيها الخير لينا تتأدي بينا شي مراات للتهلكة. تنمشيو مع الأحاسيس ديالنا و صاافي. يلا شي حااجة بانت لينا زوينة، تنقولو أنها زوينة و تنلتزموا بيها.

و لكن فالدين ديالناا، داك الشعور ديال هاد الحااجة زوينة و صاافي ماكاافيش. الدين ديالناا الإسلام هو دين كامل، مكتمل، مفصل و نهائي و ماترك تا شي حااجة للصدفة ولا للشعور ديالنا.

الصحابي عبد الله بن مسعود رضي الله عنه قال: "اتبعوا ولا تبتدعوا، فقد كفيتم، كل بدعة ضلالة". خاصناا نعاودوا نقرااو ديك العبارة ديال "فقد كفيتم".