هضرنا على أن الدين مثالي و كامل و بلي النجاة ديالنا فهاد الحياة تيعتمد على الإتباع ديال الدين كما منزل فالقرٱن و فالهدي النبوي و موضح لينا فالأمثلة ديال السلف الصالح. و أي عمل لي ماشي من الدين غادي يترد.

داباا غادي نتعمقوا كتر شويا و نشوفوا شنو السمية ديال هاد العمل لي تيترد. و الإسم ديالو هو "البدعة". و غالباا اتكون سمعتي هاد المصطلح من قبل، و عاارف انه تيهضر على الأمور لي الإنسان داار. و لكن غاادي نزيدوا نوضحوا هاد المفهوم كتر فالشريعة.

🔴 البدعة فالدين هي طريقة في الدين مخترعة تضاهي الشرعية يقصد بالسلوك عليها التقرب إلى الله تعالى.

1️⃣ أولا، هي مخترعة يعني ماكانتش فوقت الرسول ولا فوقت الصحابة و التابعين. هي حاجة محدثة، تضافت للدين من بعد. ماكاين عليها حتى شي حديث ولا ٱية قرٱنية.

2️⃣ ثانيا، هي إضافة فالدين ماشي فالعادات و التقاليد. و هادي مسألة مهمة لاحقاش كاين بعض الناس لي تتقولهوم أن شي حاجة بدعة و تيجي يقولك اوا حتى الطيلي راه بدعة حيت ماكانش فوقت الرسول. هاد الهضرة ديالهوم تتجي بسبب الجهل أو الكبر على الحق فالغالب.

3️⃣ ثالثا، تضاهي الشريعة بمعنى تتقلد الشريعة و تتشبه بيها. تيكون الفعل تيحاكي شي صلاة ولا صيام ولا ذكر، تتحس بيها بحال شي إخلاص لله، و لكن هي غي خدااع.

4️⃣ رابعا، يقصد بيها التقرب إلى الله. الشخص تيدير هاد العمل و هو تيعتقد أنه تياخد الحسنات. و هذا هو الفرق بينها و بين الذنوب. الذنب الإنسان تيديرو و هو عاارفوا غلط و غادي ياخد عليه سيئات، أما البدعة الإنسان تيكون واهم أنه غاادي يااخد الحسنات.

و هذا هو المعنى ديال البدعة فالإصطلاح. التعريف راه وااضح و لكن بعض الأشخاص تيصروا على أنه كاين بدعة حسنة و تيستدلوا بواحد الحديث لصحابي معروف.