علاش گااع هاد الهضرة على البدع؟

علاش البدع سيئة؟ شنو فيها يلا زدت شي حااجة لي تنحس أنها زوينة و غادة تقربني لله؟ ياك الأعمال بالنيات؟ يااك الدين دين يسر. يااك الله رحيم و عليم بقلوبنا؟ علااش نكونوا متشددين و نبقااو غي هاادي حراام، هادي مانديروهااش.

هادوا كلهوم أسئلة و أفكار تيطرحوها الناس بخصوص البدع، و فهاد الجزء غادي نحاولوا نبينوا علااش البدع خايبة، و علااش گااع هاد الضجيج ناايض بخصوصهاا. و شنو هوما المخاطر و الأخطاء لي تنوقعوا فيها فااش تنبغيو نزيدوا فالدين - بقصد أو بغير قصد.

1️⃣ البدع هي إتهام بالنقص للرسول و الله سبحانه و تعالى

أي بدعة لي الإنسان تيديرها بقصد ولا بدون قصد هي إتهام أن الدين كان نااقصة فيه شي حاجة عاد حناا خاصنا نضيفوها باش نغطيو هاد النقص. بحال يلا تتقول أن الله سبحانه و تعالى غفل على مسألة فالدين، ماكملش الشريعة، و الله سبحانه و تعالى منزه عن هاد الوصف.و هو أيضا إتهام أن الرسول خان الأمانة و مانقلش لينا الدين كما أُنزل عليه.

2️⃣ البدع تتفرق الأمة

القرٱن و السنة تتوحدنا على الطريق المستقيم. و لكن فاش تتجي طائفة من الناس و تتبتدع شي حااجة جديدة فالدين، تيكونوا ميزوا و فصلوا راسهوم على بقية المسلمين. و فاش غاادي يجي شخص اخور و يضيف شي حااجة غاادي يكون سااهم فتقسيم هاد الأمة.

كل طائفة تتولي تتشوف راسها مختلفة و ربما أفضل حيت هي عندها واحد الذكر و العبادة لي ماعندش الطائفة لوخراا. هنا تتبدا التفرقة لي عارفين أنهاا فاللخر تاضعف الأمة.

3️⃣ البدع تتنتهي بالشرك

معلوم أن أكبر الكبائر هي الشرك بالله تعالى، و غالبا ماتتكون هاادي هي النهاية ديال الشرك. تتبدا بإضافة صغيرة لي تتحس بيها عادية، لكن هاد الإضافات مع المدة تتأدي لتقديس الأشخاص، الحلف بغير الله، و تتطعن فالتوحيد.

4️⃣ صعوبة التوبة من البدع

داباا الإنسان فاش تيدير شي سيئة، تيكون عارفها و تيكون ديما واحد التأنيب دالضمير لي تيسااعد أن الإنسان من بعد يقلع على داك الفعل. و لكن فاش تتكون تادير بدعة، الإنسان تيقول مع رااسو أنه تيدير حاجة زوينة، و تتكون صعيبة أنه يقلع عليها من بعد. و إبليس تيفضل البدعة على المعصية، لاحقاش المعصية ممكن تطلب التوبة إلى الله منها، و لكن البدعة تايظن الإنسان أنه تيتقرب إلى الله تعالى و ماتيتوبش إلا بفضل من الله.

5️⃣ البدع تاضيع أعمال سنوات

كيما قلنا من قبل، أي عمل لي ماشي من الدين فهو مردود على صاحبه و غير مقبول فالدين. و الإنسان المبتدع تيكون تيقوم بهاد العمل لسنوات و هو تيظن أنه تيااخد الأجر و لكن تيكتشف من بعد أن الأعمال ديالو ذهبت سدا، بل بالعكس ممكن ياخد عليها الذنوب كتر من لو ارتكب معصية فقط. لاحقااش ربما شي شخص غاادي يشوفوا و غاادي يقلدوا و غاادي يكون عليه الوزر ديالو و الوزر ديال أي شخص قلدوا فالبدعة لي ابتدع.

6️⃣ البدع تاضيع السنن

كلما الشخص و المتجمع بقا تيدير البدع كلما ماتوا السنن لي وصانا عليهوم النبي. حيت الإنسان مايقدرش يدير كولشي، يلا درتي شي بدعة راك تتكون هملتي واحد السنة. و العكس صحيح: بغيتي أنك تخلص من البدع، بداا تقلب على السنن و تمارسهاا.

7️⃣ الطرد من الحوض يوم القيامة

فحديث معروف في البخاري ومسلم في صحيحيهما أن النبي -صلى الله عليه وسلم- قال: " يُجَاءُ بِأَقْوَامٍ يَوْمَ الْقِيَامَةِ فُيُؤْخَذُ بِهِمْ ذَاتَ الشِّمَالِ فَأَقُولُ يَا رَبِّ أُصَيْحَابِي!! فَيُقَالُ: إِنَّكَ لَا تَدْرِي مَا أَحْدَثُوا بَعْدَكَ"

اختلف أهل الحديث فشكون هوما الناس المقصودين فهاد الحديث. البعض قال أنهم المنافقون و المرتدون عن الإسلام بعد وفاة النبي. و قال اخرون أن المقصود هم أهل الكبائر من المعاصي و أصحاب البدع.

لهذا الإنسان خاصوا يبعد على البدع و يعرف أن المخاطر ديالها أكبر بكثير من المعاصي. و فالختام ديال هاد الفصل غادي نشوفوا كيفااش الإنسان يقدر يبعد على البدع من دابا للقدام.