1️⃣ البدعة

أكثر بدعة تينوض عليها النقاش هي الإحتفال بذكرى ميلاد رسول صلى الله عليه و سلم يوم 12 من شهر ربيع الأول. و الناس تتدعي أن هاد الإحتفال راه واجب و تيوصفوا أي واحد لي تيقول أنه بدعة و تيعارضوا على أنه ضال و متعصب حيت بالنسبة ليهوم هذا راه تعبير عن حب الرسول. و طرق الإحتفال ديال هاد الناس تتختلف، ولكن بغض النظر على الطرق ديال الإحتفال ديالهوم تيبقى الحكم واحد.

2️⃣ الحكم

حكم الإحتفال بميلاد الرسول صلى الله عليه و سلم هو بدعة. هذا إحتفال لي ماكانش فعهد الرسول ولا فعهد الصحابة، ولا التابعين. الأعياد الدينية لي عدنا فالإسلام هوما عيد الفطر و عيد الأضحى.

و هاد الإحتفال لي الناس تتدعي أنه تعبير عن الحب تيولي طريق مؤدي للشرك كيما تنشوفوا فبزاف ديال المواسم منها موسم الشيخ الكامل لي تيكون فمكناس. فين ذكري ميلاد الرسول تتولي مناسبة لي الناس تيقوموا فيها بجميع الفواحش و المنكرات. و تتأدي إلى الغلو و التوسل بالرسول أو بغيره. و حتى يلا كان هاد الإحتفال المزعوم ديالهوم خالي من دوك المنكرات تيبقى تطاول على دين الله لي راه كامل و على الهدي النبوي.

كما أن حب الرسول و التعبير عن هاد الحب ماشي مسوغ لأن الإنسان يخلق عبادات جديدة. و هذا هو الفخ لي طاحوا فيه اليهود و النصارى. و حنا واجب علينا نخالفهوم فالدين مااشي نتشبهوا بيهوم. و لي دار هاد الإحتفال لأول مرة هوما الرافضيون فالقرن الرابع هجري و كانوا ابتدعوا حتى ضرب الصدور فيوم عاشوراء و غيرها.

زائد، لم يثبت بشكل قطعي أن الرسول ولد يوم 12 من شهر ربيع الأول، و لكن ثبت أنه توفي فهاد اليوم. عليها، هاد الناس لي تيحتافلوا راهوم تيحتافلوا بذكرى وفاة الرسول.

3️⃣ شبهات مختلفة

و كاين بعض الشبه لي الناس تاتطرح بخصوص جواز الإحتفال بيوم ميلاد الرسول، و منها:

🔴 قولِه تعالى: {قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا} [يونس: 58]، و الناس زعمات أن أعظم فرح هو الفرح بميلاد الرسول. بطبيعة الله عارفين أن ميلاد الرسول نعمة، و البعث ديالو نعمة، و الهجرة ديالو نعمة، و لكن واش غادي نحتافلوا بگااع هاد النعم. غادي نردوا گااع هادوا أعياد!!؟

زائد أن فضل الله و الرحمة ديالو لي مذكورة فهاد الٱية هي القرٱن و الإسلام، ماشي يوم ميلاده. و الناس لي تتقولك تتعني يوم ميلاده، واش النبي صلى الله عليه و سلم مافهمش هاد المعنى و هو لي نزل عليه القرٱن؟ و يلا كان هذا هو المعنى و الرسول صلى الله عليه و سلم فهموا، علاش مابلغناش بيه؟ و قبل مايجاوب أي واحد، خاصوا يعرف أنه يلا دعى أن الرسول مابلغناش بأي حاجة من الدين راه إتهام بخيانة الأمانة.

🔴 الشبهة الثانية استِدلالُهم بالحَديثِ الذي أخرَجَه مُسلِمٌ عن أبي قَتادَة الأنصاريِّ رضِي اللهُ عنه، أنَّ النبيَّ صلَّى الله عليه وسلَّم: (سُئلَ عن صَومِ الاثنَينِ؟ قال: ذاك يومٌ وُلدتُ فيه)، و قالك ان هذا دليل على وجوب الإحتفال بيوم ميلاد الرسول. و لكن هاد الشرح تاشي حد من العلماء ماقال بيه ولا من شراح الحديث الأوائل.

أما بخصوص الشكر لله على ولادة الرسول فيلا بغينا نقوموا بيهاا خاصها تكون كيما عمل رسول الله و كان تيصوم يوم الإثنين من كل أسبوع. ماشي الإحتفال بالمولد ديالو بهاد الطرق لي تنشوفوا اليوم.

4️⃣ البديل

أما لي بغا يحتفل بالرسول و يعبر على الحب ديالو فأفضل طريقة هي إتباع السنة ديالو و الإبتعاد عن البدع. مايمكنش إنسان يدعي أنه تيحب شي إنسان و هو تيعارضوا. فكيفااش الناس تتدعي حب الرسول و هي تتعارضوا و تتقوم بهاد البدع لي نهانى عليه الصلاة و السلام و حذرنا منها.