علاش أنا داير هكا؟
.png)
علاش أنا داير هكا؟
هاد السؤال تاخد تقريبا ماتيجاوب عليه بصراحة.
تتحل عينيك بالليل، و ماعارفش علااش ضرباتك الفيقة ديك الوقيتة. تتهز الطيلي تشوف شحال السااعة ماشي حيت بااغي تعرف الوقت، غا حيت واحد الجزء منك بااغي يعرف شحال مزااليه دالوقت على الصباح، و واش يقدر يعااود يديه النعاس. تتفيق، و تتمشي لطواليط، تترجع فحالك، و تتعاود تخشى فلفرااش.
و موراها تتبدا القصة ديالك، تيبدا الروتين الليلي لي راك حاافظوا.
الجسم ديااالك عياااان، عينيك تقال عليك، يعني گااع دوك الشروط ديال النعاس كااينة. نتاا مرهق، عياان، يعني رااه خااص يديك النعااس. و لكن قاالك "اووهوو". قاالك و الله لا نعستي ولا شفتيه.
عقلك تيقولك اجي لمك نعااود ليك جميع الأخطاء لي درتي فحيااتك، جميع الأمور لي قلتي و ماكاانش خاصك تقولها، جميع الأمور لي خبيتي فقلبك، و كاان خااصك تهضر عليها و تقولهاا. تيدوز ليك شريط حيااتك قداام عينيك. الأفكار لي كنتي تتفكر فيهوم بالنهار و باليل قبل ماتنعس، تيجي يكملهوم. و ديك المشكلة لي ماعند مهاا حل، تيبغي يقولك أجي نفكروا فيها داباا مع الفجر. النااس ناعسيين و نتاا جاالس تتفكر.
و نتا يا مسكين و يا مسكينة ... تتساينوا العقل ديالكوم يحبس.
و لكن العقل ماتيحبسش.
و فاللخر، واحد السؤال تيضرب ليك فرااسك. فداك الليل، فداك الإرهاق، فداك الستريس، و الغضب لي تتحس بيه، تتسول رااسك:
علااش أنا هكاا؟ علااش الناس ناعسيين، و أنا جالس تنتقلب فالفراش؟ علااش كولشي مرتااح، و انا بوحدي لي هكاا و ماعاالم بيا غي الله.
فاش تنطرحوا داك السؤال الحساس ديال "علااش انا دااير هكاا؟" هذاا راه تيقيس شي حااجة أعمق من الستريس و صاافي. هذاا راه سؤال عندوا علاقة بتقدير الذات، عندو علاقة بالقيمة ديالك كإنسان.
فاش تنسولوا راسنا داك السؤال، لي تنقصدوا و لي تنحسوا بيه هو: "وااش فييا شي مشكل؟" .. "وااش أنا أضعف من الناس؟" .. "وااش فييا شي عيب؟" .. "وااش انا ضعيف؟" .. "علااش مانقدرش نكون بحال الناس لي عايشين بخير و غير انا لي تنعااني؟"
و الجوااب لي نبغيك تسمع و تعرف هو "لا لا لا لا"
لااااا
مافيكوم حتى شي مشكل. المشكل كااين فشنو تعلمتوا على الستريس و على الصحة النفسية، ولا ربما المشكل هو فشنو ماتعلمتوش. حيت ماعدنااش فالمدارس شي مادة ديال الصحة النفسية و مزاال هاادي ماشي شي حااجة لي الناس تيهضروا عليها بأريحية كبييرة.
لي نقوليك دابا هو المرة الجاية فاش تلقى راسك تتفكر "علاش نتا داير هكا؟" بدل داك السؤال ب"شنو تيحاول عقلي يقوليا؟"
و شتو راه المشكل ماشي هو نطرحوا داك السؤال، المشكل هو الإجابة دالعقل لي تتكون غالطة و حنا كنصدقوها.
