عقلك ماتيقدرش يفرق ما بين شي خطر حقيقي و ما بين الخوف و القلق
.png)
عقلك ماتيقدرش يفرق ما بين شي خطر حقيقي و ما بين الخوف و القلق
كنت قلت ليك فالفصل الأول بلي كنت خدام فمنطقة سميتها تافرانت لي ماكانتش عاجباني. بفضل الله، قديت أني نتقل و نمشي نخدم فإقليم صفرو، باالضبط فمدينة صغيرة سميتها 'المنزل' و فالصيف دالعام لفايت كان خاصني نمشي لتما باش نشوف الكرا و نقاد شي أمور باش نبدا الخدمة تماا.
دابا أنا نتاقلت لبلاصة حسن و كان من المفترض أني نكون فرحاان. و بصح كنت فرحاان و لكن فنفس الوقت كنت مستريسي. و مافهمتش علااش!! كنت تنوجد باش نرحل حوايجي من مكناس لهاد لبلاصة جديدة، نشوف الكرا، و نقاد شي أمور. و داباا منطقيا كولشي كاان سااهل بالنسبة ليا. كان عندي لفلوس باش نشوف شي دار مزياانة، باش نشوف شكون لي يدي ليا حوايجي، و كنت تعرفت على واحد جوج أساتذة: مصطفى حشاش و بوجمعة بودرة لي كانو تيساعدوني فأي حااجة. يعني منطقيا ماناقصني تا خير. ماخااصني واالو.
و لكن واخاا هكااك كنت مستريسي.
و مااشي غي شويا مامرتااحش. بصح كنت مستريسي و مافاهمش علااش، و لي هضر معاياا كنت تنتعصب عليه. باالي مشغول مع شنو خاصني ندير، شنو خاصني نشري و شنو تابعني. كاان راسي مزير عليا.
و مزاال عااقل كنت تنسول رااسي: علاااااش؟ علااش أنا مستريسي واخاا عاارف بلي هادشي كاامل سااهل و بلي عندي لي يعاوني؟ عقلي كان تيقول حااجة، كان تيقول كولشي بسيط، و لكن الجسم ديالي ماكانش متيق و كان مزير.
ماكنتش عاارف علاش ديك السااعة.
و لكن داباا عاارف، و داك الجواب غير بزااف دالأمور فييا، و خلااني نجي نكتب ليكوم هاد لكتااب.
❤️
عقلك عندو نظام ديال الحمااية
عقلك عندو خدمة وحدة هي يحميك من اي حاجة لي ممكن تضرك.
و هاد النظام ديما خداام. ماتيطفااش. بحال التلااجة ديماا خداام. ديما تيقلب على الحاجة لي ممكن تأديك. تيقرا البيئة ديالك، الجسم ديالك، الأفكار ديالك، الناس لي دايرين بيك، و المحيط ديالك بصفة عاامة. و فااش تيحس بلي شي حاجة خايبة اتوقع ليك - شي حاجة لي مامتوقعهااش، شي حاجة لي خارجة على السيطرة ديالك، شي حاجة مجهولة -، تيطلق واحد الصونيط، واحد المنبه باش ينبهك و يحذرك.
و المشكل هو داك نظام الحماية حساس و تينفعل على أبسط حاجة.
المرة الجاية فاش تحس بالستريس تيسيطر عليك واخا حيااتك الخارجية بخير، قول مع رااسك "هذا نظام الحماية خداام".
ماتجاهلوش. اعترف بلي راه كااين و بلي تيدير خدمتوا. و غاادي ينقص الصدااع ديالو.
دمااغك ماشي خااسر، غي شي مرات تيدير خدمتوا كتر من القيااس.
