واش ممكن تكون مدمن على الستريس بلا ماتحس بيها؟

اييه، ممكن و تتوقع لبزااف دالناس: الإنسان ممكن يولي مدمن على الستريس و مايقدرش يعيش بلا بيه. 

شكون هاد لمسطي لي ايولي مدمن على الستريس و مايقدرش يعيش بلا بيه؟ 

بزااااف مناا. 

داباا لي تيوقع هو الجهاز العصبي تيبقى عاايش فديك الحالة ديال الستريس لمدة طويلة حتى تيتأقلم معاها. تتولي تجيه عادية. و من بعد لي تيولي يجينا ماشي عادي هو الهدوء. تيولي الإنسان مولف الستريس، الأكشن و الدراما. و يلا ماكان حتى مشكل، ماتيتييقش. تيحس بلي شي حااجة فشكل، ناقصة، بحال الهدوء قبل العاصفة. تيظن الإنسان انه راه شي مشكل جااي. و تا حنا فالثقافة المغربية العوجة ديالناا تنقولوا "الله يخرج هاد الضحك على خير". شوفوا سطااج الوحش فالوسوااس. نتاا بخير، فرحاان، تاضحك، و حااضي مع رااسك لا شي حااجة خاايبة توقع. 

تخاايل شي واحد لي كبر فوسط عائلة لي فيها غي المشاكل و الدباز. ديما الغوات، لباب يتسد بالجهد، و ديما الصراعات. بنادم غادي يتأقلم و الجهاز العصبي ديالو غادي يقول هادي هي الحياة الطبيعية - واخاا خاايبة. 

أيجي واحد النهار ايمشيو يستقروا، يديرو دارهوم، يتلاقااو ناس جداد، و محيط لي مافيهش الفوضى. 

أتجيه فشكل. 

أيبقاو يتسناو الباب يتسد بالجهد. أيبقاو تيسااينوا شي حد ينوض معاهوم مشكل. أيبقاو تيتنسااو الدبااز. 

و يلا ماجااش شي مشكل، هوما غادي يخلقوه. و الحاجة لي تاضر هو غادي يخلقوا مشكل بلا مايحسوا. غاادي يكونو مرتاحين و حيت مامولفينش هاد الرااحة غاادي يخلقوا مشكل و ماعارفينش علااش. و غالباا ايلوموا راسهوم من بعد. أيقولوا شي مشكل فييا. 

و المشكل لي كااين هو انهم ولفوا واحد البيئة لي المشاكل فيها كثيرة. و الدماغ ديالناا ديماا تيبغي يرجع للحاجة لي حنا مولفين واخاا تكون خاايبة لينا. 

ربماا نتا او نتي كنتي فشي علااقة من قبل لي كاانت مزياانة. و لكن جااك القنط فيهاا. جااك القنط حيت مولفا علاقات لي سامة من قبل. و ربماا نتي أو نتاا جبدتوا مشااكل فديك العلاقة. شي هضرة بسيطة خرجتوا منها مشكل، هضرة عادية رديتوها إنتقاد. هادشي ماشي هجوم عليكوم، هذا غي إشارة انكم ولفتوا الصراعات لدرجة الهدوء ولا تيسبب ليكوم صراع داخلي أسوء، و تتقروا انكم تسكتوا داك الصراع الداخلي عن طريق افتعال صراع اخور مع طرف ثااني، حيت على الأقل هناا تيكون طرف اخور لي يمكن تلوموه، يمكن تفرغوا ديك الطاقة السلبية فيه هو/هي، حسن من أنكم تفرغوهاا فرااسكوم. 

دابا سول راسك بصراحة، فاش ماتيوقعوش المشاكل و تتكون الحيااة كاالم، واش تتجيك غريبة؟

واش تتسنى مشااكل يوقعوا واخاا تكون حيااتك هادئة؟

نتا ماختاريتيش تكون مدمن على الستريس، و لكن هادشي لي وقع. و لكن راك تقدر تختاار ليوم انك تغير راسك و تولي مدمن على الراحة النفسية.