بلا ستريس، ماغاديش نقدر نخدم
.png)
بلا ستريس، ماغاديش نقدر نخدم
هاادي كنت أنا تنطييح فيهاا. 🐸
كنت ديماا تنقول بلي الستريس مزياان، تيخليني نخدم و نتقااتل. تيدفعني نزيد للقداام. مزياان يكون عندك مواعيد لي خاصك تسالي شي خدمة قبل منهوم. كانت تتجيني بحال شي تحدي. بحال فالأفلام و الرسوم فاش تيجي شي عدو جديد البطل تينوض و تيتقااتل، داك العدو تيكون داافع قوي باش البطل ينوض و يطور رااسو.
الستريس شي مراات تنعااملوه بحاال عدو داخلي. لي فااش تيجي، تيخلينا نوضوا و نتقاتلوا، لدرجة ولينا تنحااولوا نحافظوا عليه، ماشي نحاربوه. شي مراات بنادم تيكون جاالس مرتااح، شويا تينوض يخدم فشي حااجة و يزرب رااسو، فوق ماتتكون مرتااح، دمااغك تيقلب على شي حاجة لي تدير ليه الستريس باش ديماا يعطي مزيااان.
و لكن نفكروا فواحد الحاجة: فكر فأحسن حاجة درتي، فكر فشي خدمة لي تقنتيهاا. شي لحظة لي كنتي خدام و مركز على شي حااجة لي تتبغي، شي حاجة لي نتا داباا مفتااخر بيهاا.
مثلا، أنا مفتااخر بهاد لكتااب و گااع لكتوبة لي درت قبل منو. تانتاا فكر فشي حااجة ديالك لي مفتخر و متفشخر بيهاا. صاافي فكرتي؟
سول رااسك داباا بصرااحة، واش الستريس هو لي خلااك تخدم و تقن ديك الحاجة؟
ولاا، كانت شي حااجة اخرى، بحال التركيز ديالك؟ الإنضباط ديالك؟ الشغف ديالك؟ الأهداف لي عندك؟ القرار لي خديتي بأنك غاادي تقن الخدمة ديالك؟ الحب ديالك لشنو تادير؟
هاد الأمور مختلفة تماما على الستريس.
ماتنسااوش: الستريس مااشي هو السر دالنجاح ديالك. ماشي هو لي خلااك مزياان فالخدمة دياالك. هو لي خلااك تنسى شحاال نتاا وااعر بلا بيه. كيماا تنقولوا، لي عندو، عندوا.
