-->

نتاا مااشي مستريسي، نتا رااك ...


 

نتاا مااشي مستريسي، نتا رااك ...


منين تيجينا الستريس؟


أنا حاليا أستاذ ديال اللغة الإنجليزية، و التلاميذ ديالي تيقولو لييا تيتشر Teacher لي تتعني استاذ بلونغلي. و لكن، هاد الكلمة ديال تيتشر، كانوا تيقولوها لييا الناااس من قباااال مانولي استاذ مع الدولة. 


أول مرة سمعتهاا كانت فاش كنت فالإعدادي. بالضبط فالتاسعة. أنا قريت فالدولة حياتي كاملة، و شحال هادي على عكس دابا ماتتقراا لونغلي حتى للتاسعة. يعني فأول حصة راه من المتوقع انك ماتكون تتعرف واالو فيهاا، حتى كلمة. 

أنا، لاا. انا واخا قريت فالدولة كنت تنهضر بيها من قبل من التلفازة. و فأول حصة ديال التعارف لحت كلمات لي بينو للأستاذ و القسم كاامل بلي راه عندي معاهاا. 

و من الحصص اللولة باانت لكولشي بلي رااني ماشي غي حافظ كلمات و لكن تنهضر بيهاا مزياان، و ولااو الناس تيجيو عندي نشرح ليهوم الدروس، واحد الصديق سميتو إدريس كان تيعيط ليا قبل ليلة الإمتحان نراجع معاه، بنادم كان تيجيب لييا writing ديالو نشوف واش فيه شي أخطااء، و أنا ديك السااعة كاان عجبني بزااااف هاد الإهتمام، خصوصاا فاش جا من البناات و أنا قبل من ديك السااعة كنت عمري فحيااتي هضرت معااه بقوة الحشمة لي كانت فييا (الزين تيحشم على زينو ). 


مهم هاد التغيير كاان زويين من نااحية. و من نااحية أخرى كان دار ليا الستريس حيت فاش تيعرفك بناادم وااعر فشي حااجة (تباارك الله) تيولي عليك واحد الضغط باش تكون مثالي، و أنا كان ديما علييا واحد الضغط فالإمتحان؛ كاان خاصني ضروري نجيب 20/20. و حمد لله كنت تنجيبها ديماا من غير شي مرة ولا جوج لي بالزربة ديالي غلطت فشي تمرين. 


مهم، هادشي إستمر حتى للباك و تأقلمت مع الستريس حيت كانوا الدروس بساط و عمري ماراجعت ليهوم أصلاا، لونغلي كاانت فالدم. 


و لكن هاادشي غاادي يتغير فااش طلعت لافااك. 

لافاك كانت مبدلة. فالليسي كنت انا اللول، و لكن فلافاك لقيت بزااف ديال الناس لي بحاالي و حسن مني. الموديلات كانوا صعابين، النيڤو لي كاان مسلكني فالليسي و كنت انا اللول فيه باان لييا ماغاديش يسلكني فلافااك. 

و تما بدا الستريس. هاد المرة مااشي غي قبل الإمتحانات، و لكن حتى فبزااف ديال الحصص حيت بغيت نرجع لداك النيڤو ديال اني نكون أنا اللول ديماا. 

و بديت تنتقااتل، تنحفظ شي مرات 20، 30، و حتى 40 كلمة جديدة فالنهار. تنكتب writing 3 ديال المرات فالنهار باش نحسن المستوى ديالي، كنت تنمشي لقهوة فالحومة فيها الويفي خفيف، تنشد قهوة ب 5 دراهم و تنطيليشاارجي أي ڤيديو تيشرح لموديلات لي تنقراا، و تنتفرج ف جوج ماتشاات، و تنجلس نرتااح و نرااجع فالدروس دياالي. 

فالأخير، حمد لله شديت ديك الإجازة ف 3 سنين، بمونسيون، و بلا راطراباج و لو مرة وحدة. و لكن فالمقابل، صحتي النفسية تدهورت، كنت مستريسي ديماا. 


و لكن - و تنابهوا معااياا مزيااان حيت هذا هو أول مصدر ديال الستريس - أناا ماكنتش مستريسي. كان عندي مشكل اخور. 

أنا كنت خاايف لا دوك الناس لي قرااو معايا قبل و كانوا تيعطو لييا تيتشر يضحكوا عليا يلا ماڤاليديتش، نبان ضعيف، و نحس بالنقص. 

أنا فالسطح كنت تنقول رااني مستريسي - و كنت تنقولها غي لرااسي، حيت مع بناادم تنقوليه كولشي نااضي كانااضي - و لكن كنت تنحس بالخوف و النقص، مااشي الستريس بالضبط. كنت تنخااف أني نباان للناس و لرااسي بلي رااني مادكيش، و ضعيف على لي كنت تنظن. 


بزااف ديال لحواايج لي نتا تتقول عليها الستريس، راها فالواقع مشكل اخوور. و ماحدك تتقول عليها 'ستريس' راك ماغاديش توصل للمصدر الحقيقي ديال المشكل. 


صو، المرة الجاية فاش ماتكونش مرتااح، قبل ماتقول مع راسك راك مستريسي، حبس و سول رااسك "بااش انا بصح تنحس فهاد اللحظة؟"


و فاش اتلقى الجواب الحقيقي غادي يبالك معاه حتى الطريق الحقيقي قداامك