-->

فاش تتعطي للحاجة و الشخص كتر من قيمتو تادير صداع دالرااس ليك.



فاش تتعطي للحاجة و الشخص كتر من قيمتو تادير صداع دالرااس ليك. 


فاش كملت قرايتي فلافاك و درت موراها واحد التكوين ديال الأساتذة فداك العام، دفعت لمباراة الأساتذة عام 2019. دزت فالإنتقاء الأولي حيت كانت عندي الإجازة بمونسيون، دوزت الإمتحان الكتابي ففاس فنص الوقت حيت نااضي أنا فلونغلي، و كاانت الأمور كلهاا طيبة. 

بقا لييا غي ندوز الإمتحان الشفوي و نحقق حلم الصغر لي هو نولي استاذ ديال الإنجليزية. 

قرب الإمتحان الشفوي و قربات معااه الخلعة. نهار على نهار كنت تنتسريساا كتر، حتى وصلت لسطااج الوحش فالستريس الليلة لي قبل الإمتحان. و عقلي بدا تيدير ليا الستريس و بقيت تنفكر فشنو ممكن يوقع غداا. 

بديت تنقول مع رااسي، شنو أندير يلا ماتقبلتش؟ شنو اندير يلا سولوني شي حاجة ماعارفش؟ شنو اندير يلا سولوني شي حاجة لي عارفها و لكن نسيت عليها؟ 

شنو ايوقع يلا حسو بيا مستريسي؟ واش غاادي يقولوا علييا ضعيف مافيديش؟ و يلا حسو بيا مخلوع ماغاديش يقبلوني. و يلا ماتقبلتش، ماغااديش نخدم. و يلا ماخدمتش، ماغاديش ندير الفلوس. ( وااخا اصلاا رااني خدمت من بعد و مادرتهومش 😂😂) 

و بديت تنتخاايل المستقبل الأسود الأكحل لي غاادي ندوز يلا مانجحتش. عقلي بدا تيقول لييا واليديك ماغاديش يبقاو ليك ديماا، و يلا ماخدمتيش غاادي تولي متقل عليهوم ، و يلا ماتوا غاادي تشرد و غاادي نكون ضعت فحيااتي. 

مهم، عقلي خداا حاجة بسيطة لي هي مقابلة عمل فين تيقولك عرف رااسك و شي أسئلة بليدة، و ردها مشكل كبييير. .


القصة أطول من هكا فالكتاب و لكن كمختصر بغيت نوريكوم العادة ديال العقل ديالنا. 


تيااخد امور بسااط و تيعطيهوم كتر من قيمتهوم حتى تيسببوا لينا الستريس.  


المرة الجاية فاش عقلك يخرج على السيطرة و يعطي اي حاجة كتر من قيمتها، سول رااسك: "شنو لي وااقع دابا؟" و "شنو الحاجة المنطقية لي ممكن توقع مستقبلا؟" 

و سطروا على منطقية. 


و وجد كيفاش اتعامل مع المستقبل المنطقي ماشي المستقبل لي عقلك تيخلعك بيه. 


الستريس ديالنا ماعندوا علاقة بشنو واقع فأرض الواقع. عندو علاقة بكيفاش عقلك تيكبر الواقع و تيخليه خاارج على السيطرة و القدرة ديالك