فين غادي فين أوا غادي ؟ أجي هنا تاخد واحد المعلومة خفيفة ظريفة واش فراسك تقدر تعيش كثر من الأشخاص العاديين 

قبل مانهضروا على كيفااش، اجيو نشوفوا وااحد الإحصائياات خفااف لي مهمين بالنسبة ليينا كاملييين.  

🚫 فالمتوسط الإنسان تينعس لمدة 8 ديال الساعات فاليوم ( الثلت ديال اليوم ) يعني الإنسان تينعس الثلت ديال حياتو. يلا كنا انعيشوا 60 عام، 20 ضااعت فالنعاس و يلا كنا انعيشوا 90 سنة، 30 منهاا ضااعت فالنعااس

🙃و الشخص العادي تيدوز 67 دقيقة فاليوم تيااكل و تيشرب. يلا فترضنا أن الإنسان أيعيش 60 سنة، راه تقريبا 3 ديال السنوات مشاات و نتا/نتي تتحشي فوجهك ( أنا يمكن ضوبل ديالها 🐸 ) 

😐  زيد عليها شحال ديال الوقت تادوز فالخدمة، فالمتوسط االإنسان تتكون عندو 40 ساعة فالأسبوع من نهار بدا الخدمة نقولو مثلا 25 سنة حتى لسن التقاعد 60 سنة، غاادي يكون دوز  8 ديال السنوات فالخدمة، 

😅+3 ديال السنواات شادين طيليفون ولا بيسي فالمتوسط، تقدر تضيف علييها حتى شحاال تتفرج فالتلفزة،  + 6 أشهر فالمتوسط تاادخل لطواليط + عاام على الأقل لي *تانضيعوه فلقراية حد لبااك ( تانضيعوه حيت غالبا داكشي لي تيقريونا لا علاقة بداكشي لي باغيين نتخصصوا و نخدم فيه من بعد و حتى بأرض الوااقع ) 

يلا جمعنا هاد الفتراات أتكون كتر من 35 سنة من حياتنا لي تتمشي بلا مامنحسو بيها  ( ااه شي حاجات لي تما رااه ضروري و  بزااف، و لكن هاادشي تيبين شحاال ديال الوقت تيمشي و شحال تيبقى لينا باش نخدمو على راسنا و نوصلوا لأحلامنا و نحققوا داكشي لي بااغيين ) 

صوو، الوقت لي تيبقالينا خااصنا نعرفوا نستاغلوه باش نحققوا الأحلام ديالنا و لكن غالباا إما  1⃣ ماتنحااولوش فخطراا تيباانو ليينا أحلام كبيرة و تنشكوا فراسنا واش بصح أنا نقدر ندير شي حااجة، واش أنا نستااحق نوصل لداكشي، شكون أناا بااش نديير هاادشي ......  

ولاا 2⃣ تتبداا و تتٱمن بلي الفكرة ديالك خااصهاا تباان و تنجح و تستحق داكشي و لكن تتعاني من مشكل ٱخور لي هو : Paralysis by analysis  = الشلل نتيجة المبالغة فالتحليل 

تيخصنا قبل مانديروا أي حااجة نكونو عارفيينها من جميع الجوانب، عاارفين شنو لي اينجح و شنو لي يقدر يفشل و شنو انديرو باش مانفشلوش، و تيخص يكون عدناا plan , b , c , d , e , و جمييع الحروف 

تنبقااو كنتيجة غي تنأجلوا لخدمة و ماتنديروا والوو و تنبقااو فحلقة مفرغة ديال خاصنا نتقنوا الفكرة بنسبة 100% ولا تقدر أنك تسمع شي حد اخوور دااار الفكرة ديالك نتااا ( يعني التنفيذ هو كولشي )

 

كون هاد القضية داروها شركات الهاتف مثلا، ماكانوش ايخرجو حتى طيليفون،📵 و لكن كل عام تيخرجوا نماذج جداد و تيحسنوهوم من خلال تجربة  المستهلك 📳 

و كااين أبحااث على هااد الموضوع : 

كااين واحد الدراسة داروها على شكون لي تيااخد ترقيات كتر فالشركات فميريكاان، كاان الرجاال تيترقاو بسرعة مقارنة مع لعيالات ( كان من ضمن الأسباب العنصرية ) و لكن السبب الرئيسي هو أن الرجاال كانو  ماتيساينوش حتى يكون فيهوم الشروط كامليين بااش يااخدو ديك الترقية، كاانو تيكتفييو بمعدل 60%  ( يلا كاين 10 ديال شروط، تيكونو متوفرين على 6 )

يلا عندهوم نسبة نجاح ديال 60% تيدفعو طلب باش ياخدو ترقية و تيحصلوا عليها حيت واخا كااين لي يستحقها كتر ماادفعش لييها ( تيسااين حتى تكون نسبة 100% )  و تيوليو هوما لوالا فالسبااق  

وحتى ف Google كاين واحد النمط ديال الخدمة  لي تيقول بأن نسبة الفشل فأي مشروع،  خاصها تكون 40% 

⬅️يعني عندك واحد الفكرة، ديرها واخا تكون أتفشل، يلا نجحاات داكشي لي بغينا و يلا فشلاات لاحظ علااش فشلاات و صلحها و عااود من اللول، تقدر تفشل بزاااف و لكن اتنجح بزااف عااود حيت عدد المحاولات كتر

#⃣ يكفي أنك تكون فكرتي فييها شوييا و حااول تنفذها و شوف النتيجة

 

و فالوااقع ماكااينش شي ضماانة بلي يلا عطيناا فكرة 100% ديال الوقت و التفكير اتنجح، ديما كاين عوامل أخرى لي خارجة على السيطرة ديالنا و ماغاديش نكونو فكرنا فيها 

فالأخير، بالنسبة للي مزاال تيشك فنسبة النجاح ديال الفكرة ديالو ولا تيقول راه مستحيلة تنجح فخطرا يسمع لواحد القصة

فعام 1954 Roger Bannister غادي يحطم رقم قياسي فسباق الميل، غاادي يكون هو أول واحد كسر المستحيل

قبل ديك الفترة كانت واحد الفكرة شائعة أن مايمكنش لشي حد يكمل سياق ميل ف 4 دقايق حيت القلب غادي ينفجر و ايموت لواحد، صوو هااد الفكرة خلعاات بزااف ديال النااس و تا حد مازعم يجرب  من غير Roger و بصح قدر يتحدى 'المستحيل' و كمل السباق ف 3:59.4

من بعد فترة وجيزة، فاش الناس عرفو بلي راه ممكن لواحد ينجح فهاد السباق بزااااااف لي شاارك فيه و حطم الرقم ديال Roger

 

بإختصار، خاصنا كاملين نحيدوا فكرة المستحيل من راسنا 

و كيماا Roger Bannister كاان هو الشخص لي بين للناس أن المستحيل ماكااينش فواحد النااحية، نقدرو حناا يلا تشبتنا بأحلامنا نبينو لشي شخص بلي تا هو يقدر يحقق أحلامو واخاا تباان مستحيلة. 

و لكن شي مراات عااود واخا نكونو عارفيين رااه لحاجة ممكن نديروها، تنعگزو حيت تتباان لينا رااه اتدي لينا مدة طويلة. اسيدي شكون قاالك خاصك ديرهاا دغياا، سير درجة بدرجة، بشوييا علييك، و فوق ماوصلتي مزياانة 💪 

صوو، لي عندو شي طموح من داباا يدير Plan و يفكر كيفااش غادي يحقق الهدف ديالو. إلا كان مازال كاين واحد الصوت فراسك 

:لي تيقولك ماتقدرش، دخل قرا هاد لبوسط وتخلص فخطرا من الشك 

طريقة بسيطة باش تخلص من القلق و التفكير الزائد - Grow B'dariija (growbdarija.com)

و لي بغا شي حاجة خرى، مرحبا أنا هنا ❤️

بيييييس ✌️