عَنْ أَبِي هُرَيْرَةَ رَضِيَ اللهُ عَنْهُ أَنَّ رَجُلاً قَالَ لِلنَّبيِّ ﷺ : أَوصِنِيْ، قَال : (لاَ تَغْضَبْ) . رواه البخاري

🔵شرح الحديث:

1️⃣الغضب شعور إنساني عادي، و لكن ماخاصوش يخرج على السيطرة، و هاد الحديث تيقصد أنه ماشي ماغاديش تغضب فخطرا، و لكن خاصك تعرف كيفاش تعامل معاه و ماديرش شي حاجة لي تندم عليها من بعد. 

2️⃣سبب ثاني لاش الغضب مامزياانش هو أن الإنسان في حالة الغضب لشي سبب شخصي يقدر يتكبر على الحق و مايقبلوش. و النبي صلى الله عليه و سلم كان تيدعي الله بقول ( اللهم إني أسألك كلمة الحق في الغضب و الرضا )

3️⃣ثالثا، القدرة على التحكم فالغضب هي من ضمن الأمور لي الله امتدح بيها عباده المؤمنين في سورة ٱل عمران: {الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (134)

و هاد الٱية تتبين بلي كاين ثلاثة ديال الدرجات فالتعامل مع الغضب: إما تصبر و تكتم داك الغضب، ولا تسامح، ولا تقابل لحاجة لي دارو الناس فيك بالإحسان، و هادي أعلى درجة. 

4️⃣رابعا، يمكن لينا نتعاملوا مع الغضب بعدة طرق. 

⚪عن طريق الدعاء: نطلبوا من الله أنه ينزع الغضب من نفوسنا. 

⚪التعوذ بالله من الشيطان حيت تيزيد يكبر داك الغضب. {وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْعَلِيمُ} (فصلت: 36)  

⚪تفكر الأجر مع الله. النبي صلى الله عليه و سلم قال: ( من كظم غيظا و هو قادر على أن ينفذه، دعاه الله تبارك و تعالى على رؤوس الخلائق، حتى يخيره من أي الحور شاء). 

⚪تحرك شوييا و تغير الجسم ديالك: يلا كنتي جالس، وقف. ولا العكس ولا تكى مهم تغير الجسم ديالك. النبي صلى الله عليه و سلم قال: (إذا غضب أحدكم و هو قائم فليجلس، فإن ذهب عنه الغضب وإلا فليضطجع). 

⚪ الإبتعاد على الأشخاص و الأشياء لي أتسبب ليك الغضب و تبدا تولف النفس ديالك أنها تكون هادئة. 

انتهى، ملخص من شرح إبن عثيمين، الإمام النووي، الإمام إبن دقيق العيد، و موقع إسلام ويب.

موعدنا غدا مع الحديث السابع عشر إن شاء الله.

دخل لهناا باش تقرى شرح الحديث الخامس عشر "ٱداب و أخلاق المسلم" 👇👇

الحديث الخامس عشر اكرام الضيف (growbdarija.com)

بييييس ✌️