لي ماقرااش الجزء الخامس عشر، يقرااه هناا: 👇👇👇

لسيرة النبوية بالدارجة - الجزء الخامس عشر: غزوة الأحزاب - Grow B'dariija (growbdarija.com)

فهاد المرة الحرب ماغاديش تسالي بالسلاح و لكن اتساالسي  بالخديعة. واحد.رجل سميتو نعيم بن مسعود ايدخل عند النبي و ايقوليه انا عاد سلمت و بااغي نعاونكوم، غي قوليا كيفااش ايعطيه النبي مهمة ديال انه ينوض صداع بين صفوف المشركين، و داكشي لي ايدير ايمشي عند اليهود و ايقولهوم وا بالرجولة وااش عمركوم شفتوا مني الشر ايقولو ليه لاا لا لا لاا، و  ايقوليهوم اوا راه حتى لييوم راه جاي ليكوم بالخير و بواحد الخبر ايقوليهوم راه غطفان غاادي يمشيو و يخليوكوم و باش ضمنوهوم مايطعنوكومش فالظهر قولو ليهوم يعطيوكوم شي أسير خليوه عندكوم و ايقبلوا و ايقولو ليه فكرة معقولة، و ايمشي عند غطفان و ايقوليهوم نفس لحاجة. ايسولهوم شنو تتعرفوا عليا و ايقولو ليه عارفينك رجولة و خصيم و ايقوليهوم راه اليهود ايهربوا و غادي يخليوكوم و باش تعرفوا راه عوالين على خزيت ايجيو عندكوم و ايطلبوا ليكوم أسير و غادي يقدموه للمسلمين.  و بصح اليهود ايديو على هضرتوا و ايطلبوا اسير لغطفان و هكاا كلشي ايبداا يشك فلاخور. و ايقولوا صدقكم نعيم، و الله يلا هضرتوا كاينة و هاادو بجوج ايهربوا و غادي يخليو الطرف لاخر لي هو قريش بوحدها فالحرب. 

قريش بقاات محاصرة المسلمين لواحد الشهر تقريبا و من بعد غاادي يرجعوا لسبب أن الخندق حاامي المسلمين، نقصاات المؤونة، و الله سلط وااحد الريح على الكفار قوية لي قضاات على ديك المؤونة لي كانت باقا عندهوم و على الهمة فالقتال. فاش شافوا راسهوم بوحدهوم و ماعندهوم ما يااكلوا، قالوا نمشيو نعلقوا لافوت ديالنا قبل مانموتوا بالجوع ولا المسلمين يجيو يقتلونا. و هكا أذن الله أن الحرب تسالا بدون أي قتاال لي داامي نيت من غير شي رمي بالنبال و شي حااجة خفيفة بزااف.

غزوة بني قريظة 

منين تسالات غزوة الأحزاب، جاا الوقت باش المسلمين يتفاهمو مع الطرف لي خانهوم وسط عقر دارهم، لي هوما يهود بني قريظة. النبي غادي يأمر المسلمين يمشيو ليها و ايقولهوم فواحد الحديث مشهور " لا يصلي أحدكم العصر إلا في بني قريظة" و هنا الصحابة ايختالفوا فواش قصد الرسول أنهم يمشيو ديس ڤيتاس و يوصلوا دغيا و صافي ولا القصد ديال الرسول كان حرفي و قصد أنه بصه العصر يصليوه تما فقط. النبي من بعد غادي يبغي يعلهوم بلي راه الإختلاف هانيا تيوقع و غي نساو. و من غير مسألة الإختلاف لي تتبينها هاد الحادثة، كاين حتى مسألة الإجتهاد. إلا وحلتي فشي حاجة فالدين و ماعرفتيش. تيخصك تقلب و تبحث و تسول أهل العلم و لكن يلا ماكانوش، نتاا تتحاول تعرف الصواب و تتجتهد من رااسك. يلا جتاهدتي و قمتي بالأمر الصواب، تيكون عندك أجران؛ أما يلا جتاهدتي و لكن خطأتي عندك أجر وااحد على داك الإجتهاد ديالك.  و هادي كااين فواحد الحديث. مسألة ثانية لي متعلقة بالخطأ هي واحد الحديث مشهور فالأربعين نووية لي تيقول " إن الله رفع عن أمتي الخطأ و النسيان و ما استكرهوا عليه "  يلا غلطتي ولا نسيتي و درتي شي حااجة ماعليك والو. الإنسان تيتحااسب على قدر المعرفة ديالو و شنو دار بديك المعرفة.

مهم نرجعوا للقصة ... 

مشاا المسلمين لبني قريظة بااش يغزيوهوم انتقاما للغدر ديالهوم فالمرة لي فاتت، اليهود ماكاانش شي قوم لي فيه القتال، غي الصدااع و صاافي، صوو فااش عرفوا بلي المسلمين جايين لعندهوم ناويين على خزيت، مشااو تخبعوا فالحصون ديالهوم و فااش عيااو من تخبيعة خرجوا لعند الرسول و تيرغبوه يساامحهوم و مشااو عند قبائل الأوس و الخزرج و تيقولو ليهوم عاقليين فاش كناا عائلة وحدة و ساكنين حداكوم، بالييز هضروا مع الرسول يعفوا عليينا و هوما بقااو فيهوم و افكروا يامات لعز لي دوزو بجوج و بداو تيهضروا مع النبي و تيرغبوه و النبي قالهوم وااش ترضااو شي حد لي منكم هو يحكم عليكوم، و اليهود قبلوا، و النبي أمر أن النااس  يمشيو يجيبو سعد بن معاذ. سعد بن معاذ كان من الأوس و كان هو معااشر اليهود قبل الإسلام، و كاان فمدينة رسول الله. و حيت كان تصااب فالمعركة، كاان خدا وقت بااش يجي لبني قريظة.  فااش وصل، شرحوا ليه الوضع كامل و هو عرف بلي ديجا بني قريظة خانوا المسلمين و نقضوا المعاهدة فوقت الشدة. يعني ماداروا فيها مايتصلح. و قاليهوم واش الحكم ديالي داايز على كلشي لي هنا و قالوا لييه ااه وشاف فالرسول زعما واش حتى نتا اتقبل الحكم ديالي. النبي جاوبوا و قالييه تا انا الحكم ديالك داايز علييا. ديك السااعة أمر بقتل الرجال، و سبي الذرية، و تقسيم أموالهم. و الرسول قال ليه 'حكمت فيهم بحكم الله من فوق سبع سماوات'

و تم تنفيذ الحكم فيهم 

سعد بن معاذ أسلم و عندوا 30 سنة و ماات و هو عندوا 36 سنة. و اهتز عرش الله للموت ديالو. أنا ماتنعلمش على الغيب ولا نقدر نقول علااش و لكن هذاا راه سبب كبير و يقدر يكون هو السبب المباشر + داار واحد المجهود كبير باش الإسلام ينتشر فالمدينة قبل ما يوصل الرسول ليها  بشوييا 💪

غزوة بني المصطلق أو غزوة المريسيع  

هاادي كاانت فالسنة الخامسة للهجرة و كاين لي تيقول الساادسة ... مهم و كان السبب ديالها هو أن الحارث بن ضرار الشااف ديال قوم بني المصطلق نااوي على خزيت و بااغي يحاارب الرسول، فااش سااق الرسول لخباار ناادى فالنااس بااش يوجدوا راسهوم لقتاال داك القوم و تجمع واحد 700 مقاتل. دغياا الحارث دخلوا الصهد و حاول يترااجع و لكن شدوه المسلمين و قتلوه. هاد الحرب الصغييرة ماكانش فيها خسائر للمسلمين من غير راجل واحد من الأنصار لي مات و كان قتلوا مسلم نيت حيت صحابو من العدو. 

و دغياا سالاو معاهوم. ترامااو فاللول بالنباال واحد السااعة و من بعد هجموا عليهوم و قضااو عليهوم دغياا 

هاد الحرب مااشي مهمة بزااف و لكن الحدث لي مهم فييها هو لي انهضروا عليه غداا

الجزء السابع عشر:  👇👇👇

لسيرة النبوية بالدارجة - الجزء السابع عشر: حادثة الإفك - Grow B'dariija (growbdarija.com)

يتبع ... 💓