لي ماقرااش الجزء الثامن عشر، يقرااه هناا: 👇👇👇

لسيرة النبوية بالدارجة - الجزء الثامن عشر: صلح الحديبية - Grow B'dariija (growbdarija.com)

من بعد صلح الحديبية، النبي تاخد خطوة جديدة فنشر الرسالة. هاد الخطوة هي مكاتبة الملوك. فاش بغا النبي يسيفط رسائل لملوك الدول المجاورة، قالوا ليه راه هاد الملوك ماتيقراوش شي رسالة إلا يلا كان عليها ختم خااص، و هو ديك السااعة دار ختم فيه 3 ديال كلمات ( محمد رسول الله ) و كل كلمة تحت لوخراا. سيفط رسائل مع مجموعة ديال الصحابة و كانت كل رسالة تابعة هاد المثال لي اندير مع واحد تعديلات بسيطة فالإسم و اللقلب و بلاد لي حاكمها. 

كانت الرسائل ديالو تتبداا ب:

1⃣ بسم الله الرحمن الرحيم، هذا كتاب من محمد رسول الله إلى ( النجاشي الأصحم عظيم الحبشة )، سلام على من إتبع الهدى، و ٱمن بالله و رسوله، و شهد أن لا إلاه إلا الله وحده لا شريك له، لم يتخذ صحابة ولا ولدا، و أن محمدآ عبده و رسوله، و أدعوك بدعاية الإسلام، فإني رسول الله فأسلم تسلم، ( يا أهل الكتاب تعالوا إلى كلمة سواء بيننا و بينكم، أن لا نعبد إلا الله ولا نشرك به شيئا ولا يتخد بعضنا بعضا أربابا من دون الله فإن تولوا فقولوا اشهدوا بأنا مسلمون / ال عمران، الٱية 64  ) فإن أبيت فعليك إثم 'النصارى' من قومك

هاد المقدمة كانت تتسيفط لگااع الحكام، أما فالعرض كان النبي تيسيفط واحد الدعوة للإسلام خاصة بداك الملك، على حساب الديانة ديالو و المعتقدات ديالو. مثلا فحالة النجاشي ( لي كان نصراني ) سيفط النبي فالعرض بلي : راه تنحمد الله  اللذي لا إلاه إلا هو و تنشهد بأن عيسى روح الله و كلمته ألقاها لمريم، و بلي راه هو عبد من عبد الله ... هادشي باش يشرح باش تيٱمن المسلمين و الإختلاف بينوا و بين النصارى. يعني يلا سلمتي راه ها شنو غاادي تبع.

 

النجاشي كان ديجا واحد الحاكم عادل لي هاجروا الصحابة عندو فاش كانوا فمكة. و لحد الساعة مزاال بزااف ديال المسلمين عندوا و عايشين بخير. فاش وصلوا هاد الرسالة من عند النبي شدها و قراها و دخل للإسلام على يد إبن عم رسول الله جعفر.

 

و تا النجاشي سيفط رسالة للنبي و كان فيها سلام و تحية الإسلام. و ذكر فيها النجاشي من بعد بلي راه وصلوا لكتاب ديالو و داكشي لي مذكور فيه بخصوص أن عيسى عبد الله و رسوله ماشي إله تا هو، راه كلام معقول و داكشي باش نزل حتى عيسى و باش تيٱمن النجاشي. و فيها إقرار بالإسلام من النجاشي لرسول الله.

الرسول غادي يطلب من النجاشي أنه يسيفط ليهوم بقية المهاجرين لي كان عندوا فالحبشة على رأسهوم ولد عم الرسول ( جعفر الطيار ) و غادي يسيفطهوم النجاشي و ايوصلوا نيشان الغزوة المقبلة. النجاشي دخل فالإسلام فالسنة السابعة للهجرة و غادي يموت فالسنة التاسعة، و فاش ايموت النبي ايصلي عليه صلاة الغائب.  

2⃣ من بعد النجاشي، الرسول ايسيفط رسالة للمقوقس ملك مصر.

عوتاني المقدمة اتكون بحال لي سيفط للنجاشي، أما العرض غادي يكون مختلف و موجه لحاكم مصر بالخصوص. 

المقوقس غادي يقول لداك السفير لي سيفط النبي راه عدنا الدين ديالنا حنا و ماغاديش نبدلوه إلا يلا كان حسن. و سفير رسول الله ايقوليه راه لي عدنا حسن و كداا، و ايشرح ليه شنو فيه بالضبط و غادي يعجبو داكشي لي سمع.

المقوقس ايسيفط عوتاني رسالة للنبي و ايقوليه فيها راه قريت لميساج ديالك و فهمت كلشي و عارف بلي فهاد الوقت ايخرج نبي، و راني تهليت فالسفير ديالك و سيفطت ليك معاه معاه لحوايج، جاريتين، و واحد لبغلة تركبها و السلااام عليكم.

هاد خونا مادخلش للإسلام و لكن واخا هكاك كان رجولة. 

3⃣ من بعد ايسيفط ميسااج إلى كسرى ملك فارس. 

المقدمة عوتاني نفسها و لكن العرض مختلف. غي هو هاد خونا ماغادي يسوق لا لمقدمة ولا عرض، ايشوف بأن النبي سبق سميتو على سمية كسرى، ايصعر و غادي يقطع الرسالة، و ايقول كيفاش يقدر يدير سميتي أنا هي الثانية و سميتو هي لولة. السفير ايرجع لعند النبي يقوليه هادشي لي وقع، و النبي ايدعي عليه بدعوة " مزق الله ملكه". فهاد الوقت كسرى ايسيفط 2 رجال باش يجيبو النبي لعندو، 

فاش ايجيو عند النبي ايقولهوم واحد الكلام لي ماغادي تعرفوه حتى لبعد غدا إن شاء الله 🐸