الجزء الثاني: مولد الرسول و 40 عام قبل النبوة 

لي ماقرااش الجزء الأول، يقرااه هناا: 👇👇👇

السيرة النبوية بالداارجة - الجزء الأول: حال العرب قبل الإسلام - Grow B'dariija (growbdarija.com)

ولد رسول الله صلى الله عليه و سلم في عام الفيل في ربيع الأول. بالنسبة للنهار بالضبط فين تولد كااين إختلافات ما بين المرااجع ديال السيرة لي قريت. كااين لي تيقول أنه اليوم التاسع، و كاين لي تيقول اليوم العاشر، و كااين لي تيقول نهار 12.

و الأب ديال الرسول كان مات قبل ولادة الرسول فاش كاان خارج في تجارة للشام.

فحديث لإبن سعد يحكي عن أم الرسول ٱمنة: "قالت عندما ولد الرسول خرج من فرجي نور أضاءت له قصور الشام". 

فاش تزاد الرسول سماه الجد ديالو ( عبد المطلب ) بإسم محمد  و كانت العادة ديالهوم ديك السااعة هي يسيفطوا ولادهوم لي يرضعهوم بعيد عن لمكان فين كاينين باش يقواو و تقوا المنااعة ديالهوم و يتعلموا اللسان العربي.

 لي اترضع الرسول بعيد عن الأم ديالو هي حليمة السعدية و فاش خداتو باش ترضعوا شاافت فديك الفترة لي كان معاهاا خير كبييير، كان عندها واحد الشاة بلا حليب و الارض كانت قاحلة و لكن من بعد الفترة لي خدات الرسول باش ترضعوا داكشي كاامل تبدل. بقا معاها حتى دار 4 سنين و ديك سااعة رداتو حليمة السعدية للأم ديالو ٱمنة بسبب واقعة شق صدر

 واقعة شق الصدر هي فااش جبريل هبط للأرض و شق صدر الرسول و خداا واحد العلقة من القلب ديالو، و قال هذا حظ الشيطان منك، مهم تطهير من رجس الشيطان، هي لي فٱية "ألم نشرح لك صدرك" )

 و كانت حليمة السعدية تخلعات من هادشي فاش وصلها لخبار. مهم رجع النبي لعند الأم ديالو وعاش معاها حتى وصل ل 6 سنين و ماتت ديك ساعة 

و من بعد وفاة الأم ديالو بقاا مع الجد ديالو حتى دار 8 سنين و شهراين و 10 أيام و توفى جدو. بعدها داز لعند عموا.

 العم ديالو كان تيتعجب حيت كان شاايف فيه شي علامات فشكل ديال النبوة و وااحد نهار كان غادي بيه للشاام و حبسوا واحد الراهب  سميتو بحيرى فالطريق، مهم هضر هو ويااه و فاللخر قالييه ماتديهش للشاام حيت هذا بااينة أيكون نبي و يقدروا تما النااس يحاولوا يديرو ليه شي حااجة، و عم النبي خداا بنصحية الرااهب و رجعوا لمكة. 

داازت سنين و لا فعمر الرسول 20 سنة و شارك فواحد.الحرب سميتها حرب الفجار، مهم المشااركة ديال الرسول  كانت خفيفة، كان تيوجد النبال للعمومة ديالو. 

من بعد هاد الحرب كان حدث ٱخر لي شارك فيه الرسول و هو حلف الفضول و الغرض من هاد الحلف هو أن يلا لقااو فمكة شي حد لي مظلوم ولا محگوور غاادي يعاونوه، و الرسول غادي يهضر عليه من بعد ماغادي ينزل الوحي عليه على اساس أنه حلف مبني على الصدق. 

حياة الرسول قبل البعثة كانت حياة الكدح و العمل. خدم تيرعى الغنم و خدم فالتجارة، و هاد التجارة فسن 25 سنة هي السبب لي غادي تلاقيه بالسيدة خديجة أول زوجاته. كانت تا هي تاجرة و اتسمع على الرسول هضرة مزياانة  تتخص الصدق ديالو و الأمانة ديالو و غادي تسيفط ليه عرض أنه تعطيه فلوس و غادي يتااجر بيهوم و اتخلصوا، اتسيفط معاه واحد دري سميتو ميسرة. و غادي يعاود ليها بلي راه الرسول فشكل بزااف لا من التعامل ديالو ولا من العقل و كلشي ما شااء الله. مهم تماا اتعرف خديجة رضي الله عنها بلي راه هذا هو الزوج لي تبغي اتهضر معاه و غادي يوافق و ايتزوجها و هو عندو 25 سنة و هي 40 سنة. و من هاادي خاصنا نعرفوا بلي راه مااشي عيب ولا حراام انك تزوج مراة لي كبر منك. السن مااشي عيب. مع الزوجة خديجة غاادي يولد جميع أولادو ( القاسم، زينب، رقية، أم كلثوم، فاطمة، عبد الله ) من غير إبراهيم.  الأولاد غادي يموتو و هوما صغار قبل النبوة.  اما البنات عاشوا و دخلوا للإسلام و لكن مااتوا فالحياة ديال الرسول من غير فاطمة لي توفات مورااه. 

من بعد 10 سنوات على زواجه بخديجة فاش دار 35 سنة تما غادي تعاود قريش تبني الكعبة و ماغاديش يقدروا بيناتهوم يحكموا شكون يوضع الحجر الأسود فبلاصتوا، و ايقولوا انرضااو بالحكم ديال الإنساان لي  ايدخل من لباب و ديك سااعة ايدخل الرسول و غادي يقوليهوم ديرو الحجر الأسود فشي طرف ديال توب كبير و كل واحد يهز جيهة و هانتوما ناضيين. داكشي لي ايديروا و ها المشكل تحل.

هاادي هي حيااة الرسول قبل البعثة. فالجزء الثالت غدا إن شاء الله أنهضروا على بداية نزول الوحي على الرسول.

دخلو تقراو الجزء الثالت هنا: 👇👇👇

السيرة النبوية بالداارجة - الجزء الثالت : مرحلة نزول الوحي على الرسول - Grow B'dariija (growbdarija.com)

بيييييييس