لي ماقرااش الجزء العشرون، يقرااه هناا: 👇👇👇

لسيرة النبوية بالدارجة - الجزء العشرون: مكاتبة الملوك- تمتة - Grow B'dariija (growbdarija.com)

خيبر هي واحد المدينة ذات حصون لي بعيدة على مدينة رسول الله ب شي 100 كيلومتر للشماال. 

السبب ديال الغزوة هو فاش دار النبي صلح الحديبية، كان ديك السااعة تهنى مؤقتا من واحد العدو لي كان واحل ليه فحلقو ( لي هو قريش ) ، و داباا جات نوبة عدو اخر لي هوما اليهود و النبي قصدهوم نيشان فعقر دارهوم لي هي خيبر فالسنة الساابعة من الهجرة. 

النبي فشهر محرم خبر المسلمين بالمهمة الجديدة، و خرج  معاه 1400 محارب.  فاش المنافقين لي كانوا فالمدينة و على رأسهم أبي بن سلول عرفوا بنية النبي و بلي راه ايهجم على اليهود، سيفط ليهوم ميسااج بااش يوجدوا راسهوم. اليهود غادي يصونيو على غطفان ( لي شاركوا فغزوة الأحزاب)  و ايديرو معاهوم اتفاق: يلا عاونوهوم ينتصروا على المسلمين غادي يعطيوهوم نص ثمار مدينة خيبر، و غادي يقبلوا و لكن فنص ديال الطريق ايتراجعوا حيت ايسمعوا شي هضرة و ايصحابهوم راه المسلمين هجموا عليهوم فعقر دارهم.  

صو اتبقا دابا المعركة المرتقبة غي ما بين المسلمين و اليهود. كعادة المسلمين فالطريق تيقولوا شي أشعاار فالطريق، لي كان تيقول هاد الشعر هو راجل سميتو عامر، وكان الشعر ديالو هو : ( اللهم لولا أنت ما اهتدينا ولا تصدقنا ولا صلينا، فاغفر فداء لك ما اقتفينا و ثبت الأقدام ما التقينا ) و النبي فاش سمع و سول شكون لي كان تيقول هاد الشعر، قالو ليه 'عامر' و قاليهوم يرحمه الله، و قالو ليه كون غا خليتيه معانا شوييا ( النبي كان يلا قال على شي حد يرحمه الله و هو غاادي يجاهد، تيستشهد؛ و داكشي لي وقع ) 

صو تمشااو واحد الشويا و وصلوا لمدينة خيبر. خيبر كانت مقسومة على 2. القسم الأول كان فيه 5 ديال الحصون، و القسم الثاني كان فيه 3 ديال الحصون. المسلمين خيموا تما و وجدوا للقتال، النبي ديك الليلة قاليهوم نهار غدا انعطي راية الإسلام لرجل يحب الله و رسوله، و يحبه الله و رسوله، و هاد الرجل كان هو علي بن أبي طالب. و علي بن أبي طالب هو لي غاادي يبدا المعركة. كعادة المعارك، كانوا ديما تيبدااو بالمبارزات، علي غاادي يواجه بطل الحصن الأول و سميتو كانت "مرحب". بجوج بيهوم غادي يقولوا أشعار لي تتمدح قوتهم فالقتال، و غادي يدابزوا و اينتصر علي. اتكون مبارزة أخرى غادي يجي فيها أخ ديال مرحب ايدابز مع الزبير و غادي يربح الزبير.

 ايكون القتال لشي أيام و من بعد اليهود ايهربوا للحصن الثاني و غادي يفتح المسلمين داك الحصن. أتختلف الطريقة باش غادي يفتحوا الحصون 4 لي بقات، مثلا فواحد غادي يقطعوا عليهوم الماكلة و اليهود ايخرجوا من الحصن حيت قتلهوم الجوع و تما ايتحاربوا معاهوم، فحصن اخر ايكون فراس جبل غادي يرميوهوم بالمنجنيق و عاد ايتحل الحصن و الحصون لوخرا اتكون بالحرب عادي. 

فاش ايوصل المسلمين للقسم الثاني من خيبر غادي يحاصروهوم 15 يوم. من بعد هاد الفترة، اليهود ايهبطوا راسهوم باش يفاوضوا المسلمين. 

غادي يهبط رجل سميتوا إبن أبي الحقيق باش يفاوض النبي. غادي يدير معاه أنه يعطيه گااع الذهب و لفلوس ديال خيبر مقابل أنه يخلي الناس تمشي بحالها. النبي غادي يقبل و لكن بشرط هو أن يلا صدق هاد خونا مخبي شي حاجة على النبي، العهد لي بيناتهوم ايكون تسالا و غادي يقبل. مهم اليهود ماعندهوم علاش يحشموا، غادي يصدق مخبي بزااف و ايتكالا و غادي يتقتل. 

الغنائم لي خدا المسلمين من خيبر كانت كتر من أي غزوة من قبل. و كاانت بزااف لدرجة ان المسلمين مايقدوش عليها كاملين، صو اليهود ايعطيو واحد الإقتراح لي صالح للطرفين. ايقترحوا على النبي  أنهم يبقاو فخيبر غادي يهتموا بالأرض و يزرعوها و يخدموا فيها، و اياخدوا النص ديال الثمار كأجرة و النص لاخور ايسيفطوه للنبي.  

خيبر هي العاصمة ديال اليهود و فاش باقي اليهود ايعرفوا راه طاحت اتختلف ردة الفعل ديالهوم، كاين لي غادي يقاتل ( وادي القرى ) و كاين لي غادي يخاف و يستسلم نيشان و يطلب الصلح ( فدك،  و تيماء ) 

من بعد هادشي، ايرجع المسلمين للمدينة من بعد.حرب لي استشهد فيها  19 مسلم و  توفي 39 يهودي. 

أحداث ثانوية فهاد الغزوة هي: 

واحد السيدة سميتها زينب بنت الحارث اتطيب واحد الشاة للنبي و اتدير السم فيها. اتعطيها النبي كهدية، ايعرف بلي راه مسمومة و ايعيط ليها يسولها علاش دارت هكاك. اتقوليه يلا كنتي نبي بصح راك اتعيق، و يلا كنتي غي كذااب انتهناو منك، و خلاها النبي  تمشي. 

جعفر بن أبي طالب ولد عم الرسول، غادي يتلاقا النبي فاش فخيبر  من بعد الفتح. النبي ايفرح بيه و غادي يقول ماعرفتش باش نفرح واش بيك نتا ولا بهاد النصر. 

النبي غادي ياخد جارية من السبي ( صفية ) غادي يعتقها و يعرض عليها الزواج و اتقبل. و اتقوليه بلي راه قبل ماتجي حلمت بلي اقمر طاح و جا عندي و راجلها ضربها و قالها تتفكري فهاداك لي فلمدينة. 

نتلاقاو غدا، ماشي  فمعركة و لكن فحدث ٱخر ✌️