لي ماقرااش الجزء الحادي و العشرون، يقرااه هناا: 👇👇👇

لسيرة النبوية بالدارجة - الجزء الحادي والعشرون: غزوة خيبر - Grow B'dariija (growbdarija.com)

عمرة القضاء ( السنة السابعة من الهجرة ) 

فاش وصل ذو القعدة النبي أمر الناس أنهم يوجدو راسهم باش يمشيو للعمرة لي كانوا تحرموا منها فصلح الحديبية. كيما قلنا، فاش النبي مشا يعتمر للمرة الأولى، دارت معاه قريش إتفاقية  لي من ضمن بنودها هو يمشي و مايرجع حتى للعام الجاي باش يعتمر. و داباا جات ديك الوقيتة.

خرج مع النبي لهاد العمرة 2000 شخص لي تتكون من گاع الناس لي كانوا معاه فصلح الحديبية إلا الناس لي استشهدوا + شي مسلمين جدد.

مشااو المسلمين لمكة و داو معاهوم بعض السلاح حيت خايفين من أن قريش تغدر بيهوم فالطريق، و لكن فاش دخلوا، حطو سلاح ديالهوم من غير سلاح ديال الراكب ( سلاح خفيف ) و الكفار كانوا فوق واحد الجبل ( قعيقعان ) تيشوفو المسلمين و تيقولو شوف عندهوم لماا فالركاابي، تيمشيو بشويا عليهوم. باينة قتلاتهوم سخانة ديال يترب، و النبي سمع شنو قالوا و أمر الصحابة انهم يكسيريو فالمشي باش مايخيلو للمشركين مايقولو.

النبي طاف على الكعبة و كان حاميه عبد الله بن رواحة و المسلمين تيطوفوا تا هوما. فاش سالا النبي من الطواف داز للسعي بن الصفى و المروة.

دوز النبي 3 أيام فمكة و النهار الرابع جاو عند علي و قالوا ليه ياكماا عوالين تزيدوا حتى النهاار راابع 🐸 نوضوا تمشيو راه تسالات و قيتكوم.

خرج النبي من مكة، و هناياا كان تزوج ميمونة بنت الحارث.

هاد العمرة عندها 4 ديال الأسماء: القضية، و القصاص، و الصلح، و القضاء. هاد الإسم لخراني هو باش معروفة؛ و السبب ديال هاد التسمية هو هاد العمرة كانت قضاء ( تعويض ) عن ديك العمرة لي ماداروش، أو حيت هاد العمرة كانت على حسب المقاضاة ( المصالحة و الإتفاق ) 

من بعد هاد العمرة تتجي 

معركة مؤتة ( السنة الثامنة من الهجرة ) 

هااد المعركة كاانت أكبر حرب المسلمين غاادي يخوضوهاا فحياة الرسول. 

السبب ديالهاا هي الرسول سيفط وااحد السفير ( حارث بن عمير )  لعظيم بصرى و لكن شدو واحد خدام عند عظيم بصرى و ربطوه و قتلوه.  و كانت هادي من ضمن أكبر الجرائم لي يقدر يدير شي واحد، و تا داباا. سفير جاي لعندك باش يوصل ليك شي خباار ماجاتش تقتلوا.

الرسول فاش عرف بالخبر وجد واحد الجيش لي كان فيه 3000 رجل، أكبر جيش فهاد مرحلة الغزوات. و النبي عطا قيادة الجيش ل 1 زيد بن حارثة، 2 جعفر بن أبي طالب ( ولد عموا ) ، 3 عبد الله بن رواحة ( يلا تقتل لول، ايقود الجيش الثاني و هي غادة )

النبي وصاهوم 2 وصايا:  1⃣ يمشيو لفين تقتل السفير و يعرضوا عليهوم الإسلام و يلا قبلوا هو هذااك، ما قبلوش = الحرب. 2⃣ الوصية الثانية هي مايقتلوش لا دري صغير ولا راجل كبير ولا إمرأة، و مايغدروش ولا يقتلوا شي واحد لي متعبد بصومعة ولا تقطعوا شجرة ولا تهدموا شي دار. 

ايتحرك الجيش نحو المعركة. مهم هاد الجيش ديال 3000 رجل غاادي يواجهوا 200 الف واحد من الرومان،  و فاش المسلمين ايعرفوا بلي رااه هاادي أكبر سانك سانك، ايبداو يتشاورو بيناتهوم و يفكروا واش يرجعوا و يشرحوا لرسول الله شنو واقع ولا نوو، ولا يكتبوا ليه شي رسالة يزيد يسيفط الجنود ولا يعطيهوم شي تعليمات أخرى. 

مي عبد الله بن رواحة ( قائد 3 ) غاادي يشجعهوم أنهم يكملوا الطريق و يقوموا بالمهمة لي جااو عليها. ايقوليهوم دابا نتوماا خارجين و باغيين تستشهدوا و باغيين الجنة، اوا هانتوما سيروا تحاربوا. راه هادشي علااش جيناا.  كلشي غادي يقبل الهضرة ديالو و ايمشيو يوجدوا راسهوم للحرب. 

شنو ايوقع فمعركة ديال 3000 شخص ضد 200 ألف، غداا و تعرفوا 🐸